‘Boracay of the North’ poproteksyunan na

Kumilos na rin ang pamahalaan upang maproteksyunan ang Nangaramoan Beach sa Cagayan na tinaguriang ‘Boracay of the North’ ng Pilipinas.

Ito ay nang magkasundo ang Department of Environment and Natural Resources (DENR) at ang Cagayan Economic Zone Authority (CEZA) nitong Pebrero 18 upang lumikha ng comprehensive management plan para matiyak na mapangalagaan at mapapanatili ang nasabing beach.

Ang nasabing memorandum of agreement (MOA) ay pirmado nina DENR Secretary Roy Cimatu at CEZA Administrator at chief executive officer Raul Lambino.

Partikular na nilalayon ng kasunduan na bumuo ng Nangaramoan Comprehensive Area Development and Management Plan.

“This will ensure the protection of the environment in the area and the sustainable development of Nangaramoan Beach. This is the biggest substance of this MOA,” paglilinaw ni Cimatu.

Naging tanyag ang Nangaramoan Beach dahil sa taglay na malinaw at malinis na tubig at puti at pinong buhangin katulad ng Boracay Island sa Malay, Aklan.

Matatagpuan ito sa Santa Ana na nasasaklawan ng Cagayan Special Economic Zone and Freeport na pinamamahalaan ng CEZA.

Pagdidiin naman ni Lambino, aasa ang CEZA sa technical effort DENR sa pagpapaunlad ng management plan na mapapakinabangan, hindi lamang mga turista, kundi pati na rin ang mga namumuhunan o nagnenegosyo sa lugar.

Pinayuhan naman ni Cimatu ang CEZA na obligahin ang lahat ng resort operators na maglagay ng kani-kanilang sewage treatment plants at mahigpit ding ipatutupad ang 20-meter shoreline easement rule.

Sinabi rin ni Cimatu na lilinawin nila sa mga operator na iligal ang mga istrukturang sasakop sa nabanggit na lugar at gigibain ang mga ito.

Nagbabala rin ang opisyal na hindi maaaring magputol ng punongkahoy sa naturang lugar.