Rota, PCV 13, HPV isasama na sa libreng bakuna
Inaprubahan ng House Committee on Health ang isang kapalit na panukala na naglalayong palawakin ang listahan ng mga sakit na maiiwasan sa pamamagitan ng pagbabakuna na saklaw ng mandatory basic immunization para sa lahat ng mga sanggol at bata.
Ipinasa ng House panel, pinamunuan ni Quezon 4th District Rep. Angelina “Helen” Tan, ang panukalang Immunization Program Act sa deliberasyon ng panel nitong Miyerkules, Pebrero 26.
Ang kapalit na panukala, na isang pagsasama-sama ng pitong mga panukala, ay nagbibigay ng isang sistema sa pagtukoy ng iba pang mga uri ng mga sakit na maiiwasan sa pamamagitan ng bakuna.
Inaamyendahan nito ang Republic Act No. 10152 na mas kilala rin bilang “Mandatory Infants and Children Health Immunization Act of 2011.”
“The bill proposes to limit the power of the Secretary of Health to determine other types of vaccinepreventable diseases by requiring the recommendation of the FEC (Formulary Executive Council) and presentation before the joint committee hearing of the Committee on Health and Demography of the Senate and the Committee on Health of the House of Representatives,” sinabi ni Tan.
Sa ilalim ng kasalukuyang batas, ang listahan ng vaccine-preventable diseases ay sinasakop lamang ang Tuberculosis; Diphtheria, Tetanus and Pertussis; Poliomyelitis; Measles; Mumps; Rubella or German Measles; Hepatitis-B; H. Influenza Type-B (HIB); at iba pang mga uri na maaaring tukuyin ng Kalihim ng Kalusugan sa isang department circular.
Ipinapanukala ang substitute bill na isama ang Rotavirus, Japanese Encephalitis, Pneumococcal Conjugate Vaccine (PCV 13), at Human Papilloma Virus (HPV) sa listahan ng vaccine-preventable diseases.