NAPC, NCIP, at PCUP nasa ilalim na ng DSWD
Inilipat na ang Presidential Commission on Urban Poor (PCUP), National Commission on Indigenous Peoples (NCIP), at National Anti-Poverty Commission (NAPC) sa ilalim ng Department of Social Welfare and Development (DSWD).
Isang joint memorandum circular na nagpapatakbo sa paglipat ng tatlong mga komisyon, na dating nasa ilalim ng Office of the President, ang nilagdaan nitong Huwebes, Peb. 27 sa DSWD Central Office sa Quezon City.
Pinangunahan ni DSWD Secretary Rolando Bautista ang paglalagda sa Joint Memorandum Circular (JMC) No. 1, Series of 2020, na inilarawan niya na “significant milestone” sa hangarin ng layunin ng DSWD na mapagbuti ang kalidad ng buhay ng lahat ng mga Pilipino.
Ang JMC No. 1 ay nagsisilbing gabay para sa implementasyon ng Executive Order No. 67, Series of 2018. Nilalayon ng EO No. 67 na gawing katwiran ang Office of the President sa pamamagitan ng pagsasama-sama ng mga pangunahing mandato at pagpapalakas sa demokratiko at institusyonal na balangkas ng Executive Department.
Sinabi ni Bautista na sa paglagda ng JMC, inaasahan na ang mga polisiya at programa ng PCUP, NCIP, at NAPC ay maitugma sa DSWD para sa kapakinabangan ng lahat ng mga Pilipino, lalo na ang mahihirap.
“It is equally important task that we also strengthen and harmonize the government policies and programs that give our fellow Filipinos a chance towards a better life,” aniya sa kanyang talumpati sa ceremonial signing ng JMC.
Kasama ni Bautista sa JMC signing sina PCUP chairperson Alvin Feliciano, NCIP chairperson Allen Capuyan, at NAPC Secretary Noel Felongco.
Sa ilalim ng EO No. 67, ipinagutos ni Pangulong Rodrigo Duterte na ilipat ang NAPC, NCIP, at PCUP sa DSWD.
Ang EO ay nilagdaan ni Executive Secretary Salvador Medialdea noong Oktubre 31, 2018.