PRRD, tao lang kasi

SA pagsasabing siya ay tao lamang, tinanggap ni Pres. Rodrigo Roa Duterte ang apology ng ABS-CBN television network dahil sa hindi pagsasahimpapawid ng kanyang political ads noong 2016 presidential elections kahit binayaran ito.

Gayunman, sinabi ni PRRD na ang quo warranto petition na inihain ni Solicitor General Jose Calida sa Supreme Court ay magpapatuloy. “Tinatanggap ko ang apology, of course,” sabi ni Mano Digong sa okasyon ng Dangal Awards sa Malacanang.

Sinabi niyang hahayaan niya ang

Kongreso ang magpasiya kung bibigyan o hindi ng renewal ang prangkisa ng higanteng TV network. Hindi niya pakikialaman ang bagay na ito. Ayaw na rin niyang tanggapin ang isinosoling balanse na P2.6 milyong halaga ng hindi naisahimpapawid na political ads. Karamihan naman sa ads niya ay nai-ere ng ABS-CBN.

Ayon sa Pangulo, bahala na ang ABSCBN kung saan o kanino ipagkakaloob ang P2.6 milyon. Makabubuti raw na ibigay ito sa charitable institutions. “Tao lang ako. Ayaw kong makialam sa isyung ito. Bahala ang Senado at Kamara sa bagay na ito.”

oOo

Nagpataw ang gobyerno ng Pilipinas ng partial travel ban sa South Korea, partikular sa mga visitor o turista mula sa North Gyeongsang province ng SK dahil sa pagsulpot ng Covid-19 doon. Inaprubahan ng Inter-Agency on Emerging Infectious Disease (IATF) noong Pebrero 26 ang pagbabawal sa mga traveler na makapasok sa ‘Pinas.

Batay sa pinakahuling ulat, ang Covid19 ay nakapatay na ng 12 tao at nagkaimpeksiyon ang may 1,260 sa South Korea, karamihan ay mula sa North Geongsang, Cheongdo county at Daegu City. Sa utos ng Malacanang, bawal sa mga turistang Pinoy ang bumisita sa alinmang lugar sa SK bilang precautionary measures laban sa karamdaman.

oOo

Naniniwala si PDu30 na hindi kailangan ng Pilipinas ang United States upang ipagtanggol ang teritoryo, o labanan ang mga komunista at terorista. Sa pagputol sa Visiting Forces Agreement (VFA) ng PH at

US, nilinaw ng Pangulo na hindi kailangan ng ating bansa ang ayuda ng isang superpower sa pagtatanggol.

Itinanggi ng Pangulo na ang pagbuwag niya sa VFA ay isa lang umanong “knee-jerk reaction” dahil sa pagkansela sa US visa ng matapat niyang alyado na si Sen. Ronald “Bato” dela Rosa, dating PNP Chief. Talaga raw gusto na niyang putulin ang VFA para sa higit na kapakibangan ng Pilipinas at hindi ng United States.

Hindi naman daw totoo ang pangakong tulong ng US sapagkat laging may kondisyon ito kapag nagkakaloob ng tulong-militar o pinansiyal.