3 PH films pasok sa India-based filmfest
KABILANG ang mga pelikulang Kaputol, Kalel, 15, at Jesusa sa 13 entries na sasabak sa Asian Competition category ng 12th Bengaluru International Film Festival sa India.
Ang pelikulang “Kaputol” ay isang pelikula sa loob ng pelikula na pinagbibidahan nina Cherie Gil at Alfred Vargas, na gumaganap sa dalawang magkaibang karakter. Si Cherie ay si Kiki at Rina, habang si Alfred ay si Robert at Caloy. Umiikot ang kuwento nito sa mga isyu ng represyn at Desaparecidos.
Bukod naman sa 12th Bengaluru International Film Festival, sasabak din ang “Kaputol” sa European premiere sa Marso.
Ang “Kalel, 15”naman ay patungkol sa buhay ng isang Catholic boy. Maliban sa kanyang ina at kapatid, wala nang nakaaalam na siya ay anak ng isang pari. Sa paghahanap niya ng pag-ibig at pagkilala nakikipagkita siya sa iba’t ibang tao na nakikilala niya sa online, hanggang sa isang araw ay madiagnosed siya na may HIV.
Nang lumayas at sumama ang kanyang ina sa katipan nito, naiwan si Kalel kasama ng kanyang kapatid at boyfriend nito. Nang mapalayas sa kanilang bahay, walang ibang mapuntahan si Kalel kundi sa kanyang ama, na nagbigay sa kanya ng pang-renta. Gayunman, binili ni Kalel, 15, na gamitin ang salapi sa ibang bagay.
Pinagbibidahan ang pelikula nina Elijah Canlas, Jaclyn Jose, at ng namayapang si Eddie Garcia.
Samantala, pinagbibidahan naman ang “Jesusa” ni Sylvia Sanchez. Patungkol ang pelikula sa isang baog na babae na iniwanan ng kanyang asawa at sumama sa kabit nito. Naiwan sa kanya ang mga anak ng asawa, at napasok sa maruming gawain ng kanyang mga kapitbahay na drug addicts.
Tatakbo ang Bengaluru International Film Festival 2020 hanggang Marso 4.