AMIN NA ‘TO!
Navy riders, napalawig ang abante sa team competition ng LBC Ronda; Morales, kumabig na
TARLAC CITY— Tuluyang sumirit sa team championship ang Standard Insurance-Navy matapos angkinin ni skipper Jan Paul Morales ang Stage Six ng LBC Ronda Pilipinas 10th anniversary race kahapon dito.
Tuluyang pumapel sa kasaysayan ang 34-anyos back-to-back champion (2016 at 2017) nang ungusan ang nakababatang si Dominic Perez ng Bicycology shop-Army at Aidan James Mendoza ng 7Eleven CliqqAir21 by Roadbike Philippines sa isa pang ‘mass finish’ ng 111.9km lap sa loob ng dalawang oras, 34 minuto at 48 segundo.
Napagiwanan ang individual leader na si George Oconer, isa pang Standard bet, ngunit nakabawi sa huling hiritan upang mapanatili ang kapit sa ‘red jersey’.
“In the first 50km, George was left behind while Navarra and I were in the first group,” pahayag ni Morales. “We only started to take over when George finally caught up with us and we carried him through.”
Tangan ng 28-anyos na si Oconer ang individual general classification lead sa kabuuang oras na 20:29:11 tungo sa pagsikad ng 116.5km Stage Seven ngayon sa Kapitolyo at magtatapos sa Palayan, Nueve Ecija.
Kumpiyansa si Oconer, dalawang ulit nagiung runner-up sa pamosong karera na inorganisa ng LBA, sa pakikipagtulungan ng Manny V. Pangilinan Foundation, na mapapanatili ang liderato.
“There are still four stages to go and anything can happen there,” sambit ni Oconer, anak ni two-time Olympian Norberto. “But I will do my best to defend the lead and hopefully win this race.”
Nakabuntot sa kanya ang mga kasangga na sina Ronald Oranza, ang 2018 Ronda king, Ronald Lomotos, John Mark Camingao, Junrey Navarra at El Joshua Carino.
Tangan ni Oranza ang kabuuang oras na 20:30:26, kasunod sina
Lomotos (20:30:29), Camingao (20:31:04), Navarra (20:31:28) at Carino (20:33:02).
Nanatili sa No. 7 si Stage 1 winner Mark Julius Bordeos ng Bicycology Shop-Army (20:33:25), kasunod sina Rustom Lim ng 7Eleven (20:33:31), Jonel Carcueva (20:33:39) at Ismael Grospe, Jr. (20:34:09)_ng Go for Gold.
Hawak din ng Navymen ang bentahe sa team competition na may kabuuang oras na 81:56:49, may 23.40 minuto angbentahe sa Go for Gold (82:20:29) kasunod ang Bicycology Shop-Army (82:22:08).
Hawk din ng Standard ang liderato sa CCN sprint at Versa King of the Mountain categories sa torneo na suportado ng ersa, 8A Performance, Print2Go, Petron, Green Planet, Bike Xtreme, Standard Insurance, Spyder, CCN, Lightwater, Prolite, Guerciotti, Black Mamba, Boy Kanin, Vitamin Boost, NLEX-SCTEX, Maynilad, 3Q Sports Event Management Inc., LBC Foundation at PhilCycling.