Problema na sa ekonomiya ang COVID-19
HINDI pa ito pandemic, bagamat muling itinaas ng World Health Organization (WHO) ang alert level nito, kung saan nakapagtala na ang 60 bansa ng kaso, mula sa 195 na bansa sa mundo.
Sa isang pulong para sa sitwasyon ng coronavirus sa mundo, sinabi ni Secretary of Health Franscisco Duque III, na iniulat ng WHO ang siyam na bansa, kabilang ang Pilipinas na hindi na muling nakapagtala ng panibagong kaso ng COVID-19 sa nakalipas na dalawang linggo. Ito’y sa kabila na may mga bagong kaso ng persons under investigation (PUI), sa pagsailalim ng mga umuuwing Pilipino mula sa mga bansa na may kaso, sa 14-araw ng quarantine.
Bago pa ang naging mga babala ng WHO, sinabi ng Kalihim, na nakapaghanda na ang Pilipinas ng hakbang para sa anumang pagbabago. Halimbawa, aniya, agad na isinailalim sa quarantine ang Alcala, Pangasinan nang makumpirma rito ang isang kaso. Nagpalabas na rin ang DOH ng itemized guidelines na susundin sakaling magkaroon ng sintomas ng lagnat at respiratory illness ang sinumang tao na dumating mula sa bansa na may kumpirmadong kaso.
Itinaas na rin ng DOH ang paghahanda ng Research Institute of Tropical Medicine sakaling kailanganin ang dagdag na bihasang mga tao para sumuri sa COVID-19, aniya, at pagtataas ng kapabilidad hindi lamang sa pambansa ngunit gayundin sa mga lokal na ospital ng pamahalaan.
Ang Pilipinas ang unang bansa na nakapagtala ng pagkamatay mula sa coronavirus sa labas ng China—isang turistang Chinese mula Wuhan—ngunit wala nang naitalang pagkamatay mula noon. Tila napunta na ang virus sa ibang mga bansa sa mundo at pinangangambahan na karamihan sa mga bansang ito, tulad sa Africa, ay hindi handa sa ganitong mga kaso, tulad sa pangangalaga ng mga hospital sa China at Singapore.
Dahil sa maraming katanungan hinggil sa kung paano kumakalat at naipapasa ang virus mula sa tao at ang nananatiling kawalan ng bakuna, malaki ang pangamba sa Unites States kung saan nakapagtala ng kaso sa estado ng Washington sa western coast ng bansa.
Tumataas na rin ang epekto ng virus sa ekonomiya, sa pagbaba ng stock market sa mundo. Dahil sa epidemya maraming pabrika sa China at iba pang bansa ang napilitang magsara, na nagdudulot ng pagbagsak sa pagluluwas ng mga hilaw na materyales mula sa mga bansang ito.
Nananatiling problemang pangkalusugan ang coronavirus sa US at iba pang bansa kung saan nakapagtala ng bagong kaso. Sa atin sa Pilipinas, isa na itong problema sa ekonomiya, sa epektong dulot nito sa manufacturing, turismo, at trabaho ng daan-daang Overseas Filipino Workers ng mga nagsarang industriya at negosyo.
Kasama ng ating programa upang matugunan ang problemang pangkalusugan, dapat na rin tayong magplano para sa nagbabantang ekonomikal na problema, partikular sa hinaharap ng ating mga Pilipinong mangagawa dito at sa abroad.