Libreng sakay alok ng LRT 2
Pagkakalooban ng Light Rail Transit Line 2 (LRT-2) at Metro Rail Transit Line 3 (MRT-3) ng libreng sakay ang kababaihan ngayong araw (Marso 8), bilang pakikiisa sa pagdiriwang ng International Women’s Day.
Sa paabiso ng LRT-2 at MRT-3, ang libreng sakay ay maaaring i-avail ng kababaihan mula 7:00 ng umaga hanggang 9:00 ng umaga at mula 5:00 ng hapon hanggang 7:00 ng gabi.
“FREE RIDE for beautiful souls boarding the LRT-2 trains on Sunday, March 8, 2020, during the peak hours indicated below. Happy International Women’s Day!” anunsiyo ng Light Rail Transit Authority (LRTA).
“Libreng sakay para kay Juana. Kaugnay ng pagdiriwang ng International Women’s Day, may Libreng Sakay ang lahat ng mga kababaihang pasahero ng LRT-2 sa Marso 8, 2020,” ayon sa abiso ng LRT-2.
“MAGANDANG BALITA! Bilang pakikiisa sa selebrasyon ng National Women’s Month, maghahandog ang MRT-3 ng LIBRENG SAKAY para sa lahat ng kababaihan sa darating na Linggo, 08 Marso 2020,” paabiso naman ng MRT-3.
“Magsisimula ang pagbibigay ng libreng sakay mula ika-7 hanggang ika-9 ng umaga at mula ika-5 ng hapon hanggang ika-7 ng gabi. Mabuhay ang mga kababaihan! Ingat po sa byahe!” dagdag pa nito.
Ang LRT-2 ang siyang nagkokonekta sa Santolan, Marikina City at Claro M. Recto Avenue, sa Maynila ngunit pansamantalang bumibiyahe lamang hanggang sa Cubao, Quezon City dahil sa sunog na naganap sa isang istasyon nito.
Samantala, ang MRT-3, na pinangangasiwaan ng Department of Transportation (DOTr), ay bumabagtas sa Epifanio delos Santos Avenue (EDSA), mula North
Avenue, Quezon City hanggang Taft Avenue, Pasay City.