Rider, huli sa paglabag sa batas trapiko, droga
Sa kulungan ang bagsak ng isang motorcycle rider dahil sa mga paglabag sa batas trapiko at mahulihan pa ng umano’y shabu at marijuana sa ikinasang Oplan Sita ng awtoridad sa Makati City, kamakalawa ng gabi.
Kasong paglabag sa Makati City Traffic Code (No helmet, Unauthorized headlight, No Tailight, No Driver’s License, Unregistered Motorcycle) at Comprehensive Dangeorus Drugs Act of 2002 ang kakaharapin ng suspek na si Keneth Anthony Carreon, 23, binata, walang trabaho, at residente sa #770 Panay Street, Barangay Pitogo sa naturang siyudad.
Ayon sa imbestigasyon ni S/Sg Glen Marvin Gallero, may hawak ng kaso, nagsagawa ng Oplan Sita ang mga operatiba ng Sub-Station 7, sa kahabaan ng P. Burgos St., Bgy. Guadalupe Nuevo sa Makati City, dakong 8:05 ng gabi.
Sinita ang suspek sa pagmamaneho ng pink/black Yamaha Mio Sporty na may plakang 1303-0311867 habang walang suot na helmet at hindi awtorisadong headlight.
Nabigo rin ang suspek na magpakita ng kanyang driver’s license at OR/CR ng motor hanggang sa isailalim siya sa body search at inutusang ilabas ang laman ng dala nitong sling bag.
Narekober sa bag ang isang cellphone na basag ang harapang screen; isang pirasong medium plastic sachet na naglalaman ng hinihinalang shabu na 2.5gramo at nagkakahalaga ng P17,000 at isa pang pakete na may lamang ‘powdered marijuana’ o “hash” na tinatayang 12.0 gramo na may street value na P6,000 na sanhi ng agarang pagkakadakip kay Carreon.
Itinurn-over ang mga nasamsam na ebidensiya sa SPD Crime Laboratory para sa chemical analysis.
Sasailalim sa inquest proceedings sa piskalya ng lungsod.