R1 milyong cash gift sa centenarian
MAY panukala sa Kamara o House of Representatives (HOR) na itaas ang cash gift na ipagkakaloob sa mga senior citizen na centenarians o 100 taong gulang. Gagawin itong P1 milyon mula sa kasalukuyang P100,000.
Kapag ito ay napagtibay at naging isang ganap na batas, aba naman, malaking tulong ito sa mga nakatatanda na ‘ika nga ay “nasa takipsilim na ng kanilang buhay.” Anong malay natin, baka dahil sa insentibong P1 milyon, sikapin nilang maging malusog, malakas para abutin ang 100 taon upang matamo ang nasabing cash gift.
oOo
Kung paniniwalaan natin ang resulta ng mga survey-survey, tumanggap si Vice Pres. Leni Robredo ng “good” satisfaction rating mula sa Social Weather Stations (SWS) sa huling apat na buwan ng 2019. Anim sa 10 adult Filipinos ang nagsabing nasisiyahan sila sa performance ni VP Robredo samantalang 23 porsiyento ang hindi. Dahil dito, ang net satisfaction niya ay +36 na itinuturing na “good.”
Ang ibang politiko o opisyal ay maganda rin ang ratings sa SWS. Tumanggap si Senate Pres. Vicente Sotto III ng “very good” net satisfaction rating na +62. Si Speaker Alan Peter Cayetano ay tumanggap din ng “very good” net satisfaction rating samantalang si SC Chief Justice Diosdado Peralta ay tumanggap ng moderate +21 net satisfaction rating.
May mga nagsasabi na hindi dapat ikumpara ang net satisfaction rating ni beautiful Leni sa iba dahil wala namang siyang hinahawakang puwesto sa gobyerno na puwedeng sukatan kung okey o hindi ang kanyang trabaho. Hindi siya dapat ikumpara kina Pres. Rodrigo
Roa Duterte, Sen. Sotto, Speaker Cayetano at Chief Justice Peralta dahil sila ay may mga hawak na posisyon.
Kung susuriing mabuti, humawak lang ng ilang araw si Robredo ng puwesto sa pamahalaan nang hirangin siyang cochair ng Inter-Agency Committee on AntiIllegal Drugs (ICAD). Tumagal lang siya sa puwesto ng 18 araw dahil sinibak siya agad ni PRRD sapagkat hindi nagustuhan ang kanyang istilo at estratehiya sa pamamahala.
Sinabi ni Barry Gutierrez, spokesman ni VP Leni, ang magandang resulta ng 4th Quarter 2019 SWS survey ay bunsod ng kasiyahan ng mga tao sa trabaho niya noon sa ICAD. Makaaasa raw ang mga tao na itutuloy niya ang tungkulin upang paglingkuran ang mga mamamayan at maninindigan para sa mga karapatan at kagalingan ng bansa.
oOo
Salamat naman at negatibo pala sa coronavirus (Covid-19) si Pope Francis. Kinansela ng Santo Papa ang Lent retreat sa unang pagkakataon ng kanyang papacy dahil siya ay sinisipon. Kinansela rin ng 83-taong gulang na lider ng Simbahang Katoliko ang iba pang schedules niya. May isang baga (lung) si Lolo Kiko. Ang isa pa ay tinanggal noong kanyang kabataan.
Batay sa mga report, ang death toll o kaso ng kamatayan sa Italy ay lumukso sa 52 noong nakaraang Lunes mula sa 34. Ang kabuuang bilang ng kumpirmadong mga kaso ng Covid-19 ay umabot na sa 2,000. Bukod sa Italy, marami pang bansa sa Europe ang ngayon ay pinagbabantaan ng coronavirus.
Sa Pilipinas, wala pa namang ganyang bilang ng mga kamatayan dahil sa Covid-19. Kakaunti rin ang positibo sa sakit na ito na ngayon ay kumakalat sa iba’t ibang panig ng mundo. Sana naman ay makatuklas na ng gamot o bakuna ang mga eksperto laban sa Covid-19.