Marcial, 2 pa sa quarterfinals ng Olympic Qualifying
TUMAAS ang tsansa nina threetime Southeast Asian Games champion Eumir Felix Marcial at dalawang kasangfa matapos umusad sa quarterfinals sa 2020 Asian-Oceanian Continental Olympic Qualifying Tournament na ginaganap sa Prince Hamzah Hall sa Amman, Jordan.
Nairehistro ng AIBA Men’s World Championships silver medalist na si Marcial ang matikas na 5-0 unanimous decision win laban kay Kirra Ruston ng Australia para magmartsa sa Round-of-8 ng men’s middleweight class.
Dominado ni Marcial ang buong panahon ng laban upang makuha ang pareparehong 30-27 iskor galing sa mga hurado mula Hungary, Algeria, Great Britain at Bulgaria, at 20-25 mula Austrian judge.
Target ni Marcial na makahirit ng puwesto sa semifinals sa pagsagupa nito kay Otgonbaatar B¬yamba-Erdene ng Mongolia na nagsumite ng parehong 5-0 unanimous decision win laban naman kay Ahmad Ghousoon ng Syria.
Nauna rito, umusad din sina AIBA Women’s World Championships gold medalist Nesthy Petecio (women’s featherweight) at Southeast Asian Games silver medalist Riza Pasuit (women’s lightweight).
Nalagasan naman ng isang miyembro ang Pinoy squad matapos tuluyang mamaalam sa kontensiyon si 2019 Manila SEA Games champion James Palicte sa men’s light welterweight division.
Lumasap si Palicte ng unanimous decision loss (0-5) kay 2017 Asian Championships gold me¬dalist Elnur Abduraimov ng Uzbekistan, 30-27, 30-27, 29-28, 30-27, 29-28 desisyon.
Maliban kina Marcial, Petecio at Pasuit, buhay pa ang pag-asa nina Ian Clark Bautista, Carlo Paalam at Irish Magno na lalaban pa sa kani-kanilang kategorya.
Susuntok si Bautista kontra kay SEA Games champion Butdee Chatchai-Decha ng Thailand sa men’s featherweight, lalarga si Paalam laban kay Ramish Rahmani ng Afghanistan sa men’s flyweight, at aariba naman si Magno laban kay Winnie Au Yin Yin ng Hong Kong sa women’s flyweight.