GOV’T, HANDA NA VS COVID-19

Tiniyak ng Malacañang na handa na ang pamahalaan sa anumang sitwasyon matapos ideklara ni Pangulong Rodrigo Duterte ang state of public health emergency bunsod na rin ng nakumpirmang local transmission ng coronavirus disease-2019 (COVID-19).

Sa isang panayam, binanggit ni Presidential Spokesman Salvador Panelo, kayang tugunan ng gobyerno ang anumang pangangailangan ng publiko at health workers, gayundin ang pagdadagdag ng pondo upang labanan ang virus.

“Naka-ready na naman tayo for whatever eventuality na mangyari. Ready tayo diyan. Sa funding naman ‘di ba ang DOH merong hinihinging P2 billion supplemental fund. Nireready na yun,” lahad ng opisyal.

Nitong Sabado, pumayag ang Pangulo na isailalim sa public health emergency ang bansa batay na rin sa rekomendasyon ni Health Secretary Francisco Duque III kasunod na rin ng ikaanim na nakumpirmang kaso ng virus sa Pilipinas.

Pinayuhan din ni Panelo ang publiko na huwag maniwala sa lumabas na ulat sa social media na inilabas na ni Duque ang rekomendasyon bago pa mag-Pebrero 21.

“Walang sinasabi si Secretary Duque, otherwise sinabi niya na yun. Hanggang walang sinasabi si Secretary Duque, ‘wag kayo maniniwala,” pagdidiin nito.

Itinaas na rin ng DOH ang alert system nito sa Code Red sub-kevel 1 kontra COVID-19 kasunod ng nakumpirmang unang kaso ng local transmission ng7 sakit.

Kaugnay nito, ipinauubaya na ng Malacañang sa local government units (LGUs) ang desisyon sa pagsuspinde ng pasok sa paaralan sa kani-kanilang nasasakupan.

Aniya, malaya ang mga LGU na suspendihin ang pasok sa kanilaj lugar kung nararamdaman nilang makakagarantiya ito sa kaligtasan ng kanilang mga estudyante.

“Discretion sa kanila yun. If they feel schoolchildren are safe, they can do that. Discretionary sa school authorities yun. Siyempre, sila ang nagde-decide nun. Sila ang administrador eh. They can suspend and then they can make another schedule to make up for the absences,” paliwanag ni Panelo.

Gayunman, sinabi ni Duque na hindi inirerekomenda ng DOH ang pagkansela ng pasok sa eskuwelahan.

Nilinaw din nito na malabo na magsuspinde ang Malacañang sa pasok sa mga opisina ng gobyerno.

Binanggit din nito na hindi rin magla-lockdown ang Malacañang kontra sa nasabing sakit.

“Bakit naman magla-lockdown sa Malacañang? Hindi naman crowded area yun. Ang nila-lockdown lang nila yung mga gatherings, where people conglomerate,” aniya.

Kahit may localized transmission na ng COVID-19 sa Phl….

Suspensiyon ng klase, hindi pa rin inirerekomenda ng DOH

Matatandaang kasunod ng anunsiyo ng DOH na nadagdagan pa ang mga kaso ng virus sa bansa, ay kaagad na nagdeklara si Navotas City Mayor Toby Tiangco ng suspensiyon ng klase sa kanilang lugar ngayong Lunes.

Nanawagan rin si Tiangco sa Department of Education (DepEd) na ipasa na lamang ang mga estudyante at pagbakasyunin na ang mga ito, at huwag nang ipatapos ang natitirang dalawa hanggang tatlong linggong pasok sa mga paaralan para sa kaligtasan ng mga ito.

Nilinaw naman ni Tiangco na walang kumpirmadong COVID-19 cases sa kanilang lugar.

Matapos ang ilang oras ay nagsuspinde na rin si Cainta Mayor Keith Nieto ng klase sa kanilang lugar mula Lunes hanggang Martes matapos na matukoy na mula sa kanilang lugar ang pasyente ng COVID-19.

Ayon kay Nieto, layunin nitong mabigyan ng panahon ang gagawin nilang pagbabahay-bahay at pamamahagi ng mga face mask, sanitizer at vitamins sa mga residente at lahat ng estudyante sa Cainta para makasigurado na malakas ang resistensiya ng mga ito kontra sa virus.

Inatasan na rin ni Nieto ang mga driver ng pampublikong sasakyan na magsuot ng mga mask sa kanilang pamamasada.,

Samantala, nagsuspinde rin ng klase si Taytay Mayor Joric Gacula, para maging handa ang mga residente kontra sa virus.

Inatasan rin ng alkalde ang municipal health office na ipagpatuloy ang pag-monitor sa mga taong hinihinalang nahawa sa sakit.

Pinaalalahanan pa nito ang mga residente na sakaling makaramdam ng sintomas ng sakit ay maaari aniyang puntahan ng health workers ang bahay ng pasyente at tawagan an Taytay Health Office emergency numbers na: (02) 8571-4858 , 09171659009 o 09176250065. Mary Ann Santiago

Dahil sa tumitinding banta ng pagkalat ng virus sa bansa, minarapat naman ni Parañaque City Mayor Edwin Olivarez na ipagpaliban ang selebrasyon ng 22nd Cityhood Anniversary ng lungsod ngayong araw (Marso 9).

“In light of the growing concerns around COVID-19, please be advised that all activities in celebration of Parañaque’s 22nd City Hood anniversary will be POSTPONED until further notice,” ayon kay Mayor Olivarez.

Ayon sa alkalde ang desisyon ng pagpapaliban rito ay para na rin sa pagiingat sa kalusugan at kaligtasan ng mga residente na pangunahin aniyang prayoridad.

“For the information and guidance of all concerned.Mag-iingat, maging alerto at panatilihin ang kalinisan sa lahat ng oras, kapwa ko Parañaqueño!,” sabi ng alkalde.

Ikinabahala ng Paranaque government ang posibleng pagkalat ng COVID-19 dahil daan-daang residente at mga kabataan ang mga lumalahok sa pagdiriwang ng anibersaryo ng lungsod kada taon.

Ilang residente naman sa Barangay Tambo at malapit sa Baclaran ang nababahala o naalarma sa pagsulpot ng maraming Philippine Offshore Gaming Operators (POGOs) na pinatatakbo ng mga Chinese kung saan pumapasok ang mga Chinese worker.