COVID-19, TUMAMA NA SA QC
3 pang lugar, apektado
Kinumpirma kahapon ng Department of Health (DOH) na umakyat na sa 10 ang bilang ng indibidwal na kumpirmadong dinapuan ng coronavirus disease 2019 (COVID-19) sa bansa, matapos na makapagtala ng apat pang bagong kaso nitong weekend.
Binanggit ni DOH Secretary Francisco Duque III, ang samples ng apat na bagong kaso ng sakit na pawang sinuri noong Marso 7 at nitong Marso 8 ay inilabas ang mga resulta, kung saan nakumpirmang positibo sila sa COVID-19.
Nilinaw ng DOH na ang ikapitong kaso ng sakit ay isang 38-anyos na lalaking Taiwanese na may ‘history of contact’ o nakasalamuha ng isang Taiwanese foreign national na bumisita sa Pilipinas at nagpositibo sa COVID-19 sa Taiwan.
Ang pasyente ay walang history of travel sa labas ng bansa at nakitaan ng sintomas ng sakit noong Marso 3. Kasalukuyan na siyang naka-confine sa Makati Medical Center sa Makati City.
Ang ikawalong kaso naman ay isang 32-anyos na lalaking Pinoy na bumiyahe sa Japan sa nakalipas na 14-na araw.
Nitong Marso 5, nakitaan ito ng mga sintomas ng sakit. Kasalukuyan na siyang nilalapatan sa St. Luke’s Medical CenterGlobal sa Taguig City.
Ang ikasiyam naman na confirmed case ng sakit ay naka-confine ngayon sa The Medical City, Pasig City, Ito ay isang 86-year-old na lalaking Amerikano na may pre-existing hypertension at history of travel sa Estados Unidos at South Korea.
Ipinahayag ng DOH, nagsimula siyang makitaan ng sintomas ng sakit noong Marso 1.
Ang pang-10 kaso ng virus ay isang 57-anyos na lalaking Pinoy na walang history of travel sa labas ng bansa. Gayunman, nagkaroon umano siya ng close contact sa isang confirmed COVID-19 case, bagamat iniimbestigahan pa naman ng DOH ang detalye ng pagkalantad niya sa karamdaman. Kasalukuyan na siyang nakaratay sa St. Luke’s Medical Center sa Quezon City.
HOSPITALS, SUSUYURIN Kaugnay nito, tiniyak ni Duque na sa ngayon ay iniimbestigahan na nila ang lahat ng kaso ng karamdaman, nangangalap ng mga impormasyon ng mga ito mula sa mga pagamutan kung saan sila naka-confine at nagsasagawa ng contact tracing sa mga taong nakasalamuha ng mga ito.
Nakikipag-ugnayan na rin aniya ang DOH sa mga concerned Local Government Units at maging sa Centers for Health Development para sa localized response sa problema at pagpapatupad ng infection prevention at control measures.
“Currently, the Epidemiology Bureau is gathering more information and validating available data on the reported cases. DOH will release all pertinent information to the public once it is available,” ayon sa DOH.
“The DOH is committed to accurate and timely reporting of verified information on the COVID-19 health situation. We have been preparing for the possibility of localized transmission in the country. Now that there are confirmed cases of localized transmission, DOH and the Inter-agency Task Force are now implementing pre-planned measures to respond to the situation,” pagtiyak pa ni Duque. “Upon confirmation of new cases, we immediately deployed additional surveillance teams and commenced contact tracing.”
Hinihikayat rin naman ni Duque ang lahat ng indibidwal na kukontakin ng kanilang surveillance teams na makipagtulungan sa kanilang isinasagawang imbestigasyon at contact tracing activities.
Hinimok rin niya ang lahat nang makikitaan ng sintomas ng sakit, gaya ng lagnat at mga respiratory symptoms na may history of travel at exposure sa COVID-19, na kaagad na makipag-ugnayan sa DOH at tumawag sa kanilang designated hotline na (02)8-651-7800 local 1149-1150 para sa kaukulang management at referral.
PUBLIKO, PINAG-INGAT Kaugnay nito, muli rin namang pinaalalahanan ni Duque ang publiko na magingat laban sa COVID-19 sa pamamagitan ng pagkakaroon ng proper hygiene, social distancing at cough etiquette.
Pinayuhan rin niya ang publiko na umiwas muna sa pagbisita sa pampubliko at matataong lugar, at huwag na munang dumalo sa mga maramihang pagtitipon, bilang bahagi ng pag-iingat laban sa virus.
“I call on the public to continue to be vigilant and practice personal preventive measures such as proper hand hygiene, social distancing, and cough etiquette,” aniya. “In the meantime, let us refrain from visiting public places and/or attending mass gatherings. DOH is exhausting all its efforts to contain the spread COVID-19. I am calling for your cooperation in this trying time, only through concerted effort at the community level will we be able to succeed against the threat of the disease,” pagtatapos pa ni Duque.
COVID-19 CASES, CONFIRMED
Sa kabilang dako, kinumpirma naman ng mga lokal na punong ehekutibo ng mga lungsod ng Marikina, Quezon at Pasig, na mula sa kani-kanilang mga lungsod ang apat na bagong COVID-19 na naitala ng DOH.
Nagpasya na sina Marikina City Mayor Marcelino Teodoro, Quezon City Mayor Joy Belmonte, at Pasig City Mayor Vico Sotto na ibunyag na nagmula sa kanilang lugar ang mga confirmed cases dahil karapatan anila ng kanilang mga residente na malaman ito upang makapagsagawa ng kaukulang pag-iingat.
Ayon kay Teodoro, ang 86-na taong gulang na lalaki na bumiyahe sa South Korea kamakailan ay mula sa Marikina City.
Tiniyak naman niya na nakikipagtulungan na sila sa DOH upang mapabilis ang contact tracing sa mga taong nakasalamuha ng pasyente at isinailalim na rin sa quarantine ang buong pamilya nito upang maagapan at kaagad na malunasan kung posibleng nahawahan rin sila ng virus.
Una na rin namang sinuspinde ng alkalde ang klase sa kanilang lungsod sa loob ng tatlong araw upang bigyang-daan ang pagsasagawa massive disinfection sa mga paaralan at mga malls at iba pang pampublikong lugar.
Samantala, sinabi naman ni Belmonte na ang 57-anyos na pasyente ay mula sa Unang Distrito ng kanilang lungsod, ngunit tumanggi pang magbigay ng ibang detalye hinggil dito.
BELMONTE, BINATIKOS Binatikos naman ng mga residente ng Quezon City si Belmonte dahil sa pagtanggi nito na isapubliko ang eksaktong lugar sa District 2 nakatira ang nahawaan ng virus.
“Paano namin kami makapag-ingat o maka-iwas kung ayaw niyang ibunyag ang lugar ng tinitirhan ng tinamaan ng virus?” pagtatanong ng mga taga-Distrit 2 sa QC.
“Hindi natin alam kung kapitbahay na pala natin ang tinutukoy ni Mayor Belmonte na dinapuan ng COVID-19. Sana, ihayag na ibunyag na niya upang hindi na mag-panic ang constituents niya,” pagdidiin naman ng isa pang taga-QC.
Sa panig naman ni Sotto, kinumpirma nito na ang dalawa pang kaso na isang 38-anyos at 32-anyos na mga bagong pasyente na kapwa lalaki ay mula naman sa kanilang lungsod.
Isa sa mga ito ang naka-confine sa The Medical City Pasig habang ang isa pa, bagamat residente ng Pasig ay naka-confine naman sa isang pribadong pagamutan sa labas ng lungsod.
Tiniyak naman ni Sotto na nakikipag-ugnayan na sila sa DOH hinggil dito at sinigurong nagpapatupad sila ng precautionary measures base sa mga inisyung guidelines ng DOH.
Matatandaang ang unang kaso ng localized transmission ng sakit ay naitala sa Cainta, Rizal ngunit apektado rin ang San Juan City dahil ang pasyente matapos na matukoy na ang pasyente ay madalas umanong magtungo sa isang prayer hall sa Greenhills Shopping Center, na kaagad namang ipinasara at ipinadisinfect ni San Juan Mayor Francis Zamora.
Bukod sa Marikina City (hanggang Miyerkules), nagsuspinde na rin ng klase ang Navotas City, San Juan City, Cainta (hanggang Martes) at Taytay, Rizal at Pasay City (hanggang Martes) dahil sa banta ng virus.
Matatandaang ang tatlong unang kaso ng COVID-19 sa bansa ay tatlong Chinese national mula sa Wuhan City na bumisita lang sa bansa. Isa sa mga ito ang binawian ng buhay habang nakarekober at nakauwi na ng China ang dalawa pa sa kanila.
Ang ikaapat na kaso naman ay isang 49anyos na abogado na bumiyahe sa Japan, habang ang ikalimang kaso ay isang 62-anyos na lalaki na siya ring unang local transmission ng sakit.
Ang pang-anim na kaso naman ay ang 59anyos na maybahay ng 5th case, na nagkaroon ng close contact sa kanya.
PUBLIC HEALTH EMERGENCY Kaugnay nito, opisyal nang isinailalim sa state of public health emergency ang bansa kasunod na rin ng local transmission ng sakit.
Inilabas ang Proclamation No. 922 na pirmado ni Pangulong Rodrigot Duterte nitong Marso 89, upang pakilusin ang mga governmental at non-governmental agencies upang tumugon sa banta ng COVID-19.
“The outbreak of COVID-19 constitutes an emergency that threatens national security which requires a whole-of-government response aligned with the Four-Door Framework for COVID-19 of the DOH and the efforts of all concerned government agencies and LGUs,” ayon sa Pangulo.
Kanselado naman ang klase sa lahat ng antas sa pampubliko at pribadong paaralan sa Pasay City simula kahapon at ngayong araw (Marso 10).
Ito ang idineklara ni Pasay City Mayor Imelda Calixto-Rubiano bilang pag-iingat sa mga estudyante laban sa banta ng pagkalat ng virus.
Sa direktiba ng alkalde,inatasan nito ang lahat ng opisyal at tauhan ng mga paaralan na linisin at i-disinfect ang kanilang mga campus at maglatag ng precautionary measures upang mapigilan ang pagkalat ng COVID-19.
Nagdesisyon din si Manila City Mayor Isko Moreno na suspendihin ang pasok sa mga pampubliko at pribadong paaralan (all levels) hanggang Marso 15 bilang pag-iingat laban sa nasabing sakit.
Nagpatupad na rin kahapon ang gobyerno ng Qatar ng travel ban laban sa 12 bansa, kabilang ang Pilipinas na apektado ng COVID-19.
Ayon sa abiso ng Qatari Embassy, hindi na papasukin ang mga pasaherong nagmula sa mga bansang apektado ng COVID-19 upang mapigilan at maiwasan ang pagkalat ng naturang sakit sa Qatar.
Bukod sa Pilipinas, sakop din ng travel ban ang Bangladesh, China, Egypt, Iran, Iraq, South Korea, Lebanon, Nepal, Pakistan, Sri Lanka at Thailand.
QRT VS VIRUS
Aayuda naman ang National Capital Region Police Office – Quick Response Team (NCRPO-QRT) sa banta ng COVID-19 sa Metro Manila.
Ayon kay NCRPO Regional Director, Major General Debold Sinas,na katungkulan ng pulisya, partikular ng QRT na maging first responders lalo na’t nagsimula na ang local transmission ng naturang sakit.
Binubuo ng QRT ang mga nurse at doctor ng NCRPO,na pawang nakasuot ng goggles , disposable masks at gloves/guwantes para sa kaligtasan at proteksiyon ng mga ito,na nakaantabay ma madeploy anumang oras.
Hindi na rin pinayagan ng NCRPO ang mga international travels at schooling kung hindi naman emergency.
“The NCRPO is taking all steps to prevent the transmission of COVID -2019 and ensure that our people are well informed. In line with this, we are also developing guidelines including what to do up to family level precautions. On our part, there is also a cancellation on the schooling and international travels of our men especially those that are not emergency,” ani Sinas.
HOSPITALS, BINALAAN Binalaan din ni Duque ang mga pagamutan na tatanggi sa mga kokonsultang pasyente dahil sa virus.
Ayon kay Duque, ang pagtanggi sa mga pasyente ay isang paglabag sa nilagdaang Performance Commitment at ang sinumang mapapatunayang lumabag dito ay pananagutin ng Philippine Health Insurance Corporation (PhilHealth).
“All Levels 2 and 3 hospitals are reminded to not refuse patients suspected or diagnosed with COVID-19,” ani Duque. “Refusal to provide care to said patients shall be considered a violation of the signed Performance Commitment and shall be dealt with by the PhilHealth accordingly.”
Pinayuhan rin naman ni Duque ang mga pagamutang ito na magtakda ng mga triage area para sa screening ng mga suspected COVID-19 patients.
Maaari aniyang mag-accommodate ang mga Levels 2 at 3 hospitals ng COVID-19 patients na may mild symptoms lamang.
Ililipat naman kaagad ang mga ito sa mga referral hospitals kung ang kanilang kondisyon ay lumala at maging kritikal.
Kabilang sa mga naturang referral hospitals ay kinabibilangan ng Research Institute for Tropical Medicine (RITM), Lung Center of the Philippines, at San Lazaro Hospital.
Pinaalalahanan naman ni Duque ang publiko na huwag iwasan ang mga pagamutang may mga COVID-19 patients at tiniyak na ang mga ito ay mayroon namang mga ipinatutupad na infectious prevention at control practice.
Masyado pang maaga upang isailalim sa lockdown ang Metro Manila kaugnay ng sakit.
Inihayag ng DOH, wala pang ebidensya na napanatili ang community transmission ng virus upang ganap sana itong ipairal.
Inilabas ng ahensya ang reaksyon bilang tugon sa kahilingan ni Albay 2nd District Rep. Joey Salceda na i-lockdown na lamang ang National Capital Region.