Siksikan sa bus, bawal na –LTFRB
Pinaigting ng Land Transportation Franchising and Regulatory Board (LTFRB) ang mga pag-iingat na hakbang laban sa coronavirus disease (COVID-19) sa bansa kabilang ang hakbang upang maiwasan ang pagsisiksikan sa mga pampublikong bus upang maiwasan ang pagkalat ng kinatatakutang sakit.
Inatasan ni LTFRB Chairman Martin Delgra III ang public utility vehicle (PUV) operators, lalo na ang mga bus, na mahigpit na limitahan ang kanilang mga pasahero kaugnay sa social distancing measure, na isa sa precautionary strategies laban sa pagkalat ng COVID-19 ayon sa World Health Organization (WHO) at sa Department of Health (DOH).
“We follow the protocol of the WHO, as well as the DOH as regards to taking any PUV for that reason (social distancing). I know, especially for buses, it’s quite crowded inside and we would like to address that by calling the attention of the operators,” sinabi ni Delgra sa isang press conference.
Ayon kay Delgra, ipinagbabawal ang pagsisiksikan ng mga pasahero sa loob ng mga pampublikong bus ngunit idinagdag na pinahihintulutan pa rin ang pagtayo sa loob ng sasakyan.
“Under our existing rules, standing is allowed to a certain extent but overcrowding is prohibited especially at this time of national emergency,” paliwanag niya.
Hinikayat din ni Delgra ang publiko na manatili lamang sa bahay kung walang kagyat na pangangailangan na pumunta sa ibang lugar upang maiwasan ang pagkahantad sa mga banta ng COVID-19.
Nagdagdag din ang transport regulatory body ng mga karagdagang patnubay sa umiiral na Memorandum Circular 2020-005 na nagpapatupad ng mga protocol sa kalusugan para sa mga PUV sa gitna ng takot ng COVID-19.
Sa ilalim ng sinususog na memorandum, inatasan ng LTFRB ang PUV operators na maayos na i-sanitize ang kanilang mga behikulo bago at pagkatapos bumiyahe ng mga sasakyan upang maiwasan ang community transmission ng sakit.
Inatasan din ang PUV operators na maglagay ng kopya ng COVID-19 hotline numbers sa kanikanilang mga behikulo, partikular na ang sa DOH sa pamamagitan ng (02) 8-651-7800 loc. 1149-115.
Inutusan din ng Board ang PUV operators na turuan ang kanilang mga driver at conductor tungkol sa mga sintomas ng COVID-19, at atasan silang iulat ang mga posibleng nahawaang pasahero sa Department of Transportation, LTFRB, DOH, local government unit, at istasyon ng pulisya.