Mga bagong kaso ng COVID-19
Kinumpirmpa ni San Juan City Mayor Francis Zamora na umakyat na sa pito ang kaso ng coronavirus disease (COVID-19) sa kanyang lungsod.
Sa isang pulong kay Zamora, city officials at department heads sa city hall, ibinunyag ni Department of Health-National Capital Region (DOH-NCR) Regional Director Dr. Corazon Flores na isang 64taong gulang na lalaki mula sa Barangay Greenhills at isang 28-taong gulang na babae mula sa Barangay Maytunas ang nagpositibo na rin sa COVID-19.
Ang dalawa ay kapwa nasa maayos naman umanong kondisyon at naka-confine sa isang pribadong pagamutan sa Pasig.
CALOOCAN Kinumpirma naman ni Caloocan 1st District Rep. Along Malapitan nitong Miyerkules ng umaga na mayroong isang pasyente sa ospital ng gobyerno sa Tala ang nagpositibo sa coronavirus.
“Matapos ang berepikasyon sa ating health officers, mayroong isang kumpirmadong kaso ng COVID-19 na na-admit sa Dr. Jose N. Rodriguez Memorial Hospital,” sinabi ni Malapitan sa kanyang Facebook page.
Gayunman, sinabi ni Malapitan na ang pasyente ay nagmula sa San Jose Del Monte City, Bulacan at hindi residente ng Caloocan.
UP FACULTY
Dalawang faculty member ng University
of the Philippines (UP) ang sinisiyasat para sa posibleng pagkakalantad sa novel coronavirus.
Sa isang pahayag nitong Miyerkules, kinumpirma ng University of the Philippines Diliman (UPD) na ang dalawang miyembro ng faculty ay nasuri noong Marso 10 para sa posibleng COVID-19 matapos dumalo sa isang academic conference sa Japan.
Tiniyak ng UP Director na si Jesusa Catabui sa komunidad na sinunod ang mga protocol sa paghiwalay ng mga pasyente at ang pagdi-disinfect sa mga lugar at ang ambulansiya na ginamit upang dalhin sila sa isang referral hospital.
ISA PA SA HK
Kinumpirma ng Department of Foreign Affairs (DFA) ang kaso ng ikalimang Pilipinong manggagawa na nagpositibo sa COVID19 sa Hong Kong, kamakalawa ng gabi.
Ayon sa natanggap na report ng DFA mula sa kanyang Konsulado ng Pilipinas sa Hong Kong, ang nasabing Pinoy ay asymptomatic o hindi kinakitaan ng anumang sintomas sa nasabing sakit.
Sa ngayon, kasalukuyang naka-confine ang Pinoy sa isang quarantine facility sa Hong Kong.
MISTING /DISINFECTING Samantala, tuluy-tuloy rin ang “misting operation” ng mga tauhan ng Manila Disaster Risk Reduction and Management
Office (MDRRMO) sa mga pangunahing imprastruktura ng Manila City government upang mapatay ang mga virus at maiwasan ang pagkalat ng COVID-19 sa lungsod.
Maging sa Marikina City ay tuluytuloy ang pag-disinfect sa mga pampublikong lugar.
Ayon kay Marikina City Mayor Marcy Teodoro, plano rin nila na bumili ng may 3,000 test kits para magamit sa pagtukoy kung sinu-sino sa mga pasyente ang positibo sa virus.