Pinay sa Milan, nahawa sa Switzerland trip
Hinihiling ng Filipino community sa Milan, Italy ang tulong ng Department of Foreign Affairs (DFA) sa pagbeberipika sa estado ng isang Milan-based Filipina household worker na nangumpisal sa isang video na nasuri siyang positibo sa coronavirus disease 2019 (COVID-19) habang sinasamahan ang kanyang amo sa Switzerland.
Sa limang minutong video na mabilis nakumakalat sa mga miyembro ng Filipino community sa Italy, sinabi ng overseas Filipino worker na siya ay kasalukuyang nakaratay sa isang ospital sa Switzerland, pagkatapos makita sa mga pagsusuri na siya ay positibo sa COVID-19.
Sa video, isinasalaysay niya na una siyang nagpakita ng mga sintomas tulad ng sakit ng ulo, lagnat at sakit sa lalamunan na nag-udyok sa kanyang amo na dalhin siya sa ospital para sa konsultasyon.
“Nagworry po ang aking amo. Nagpunta po agad kami at pinaconsult nya ko sa doctor dito sa Switzerland... Binayaran po ng amo ko ng 680 (Euro) para ma-consult po ako kung ako po ay coronavirus positive,” paliwanag niya.
Dagdag pa ng OFW, bihira siyang lumabas habang nasa trabaho maliban sa mga pagkakataon kapag nilalakad niya ang aso ngunit sinisiguro niyang nakasuot siya ng maskara.
“Hindi po ako mahilig maglalabas habang ako po ay stay-in sa trabaho… Di ko po ma-imagine sa aking sarili na ako’y ma-infect agad,” sinabi niya.
Pinayuhan din niya ang kanyang mga kapwa OFW sa Milan at Switzerland na sabihin sa kani-kanilang mga employer na ipagbawal ang pagtanggap ng mga bisita, sinabi na ang mga bisita na iyon ay malamang na nagdala ng virus.