Habang nasa bahay
MARAHIL nasa bahay ka habang binabasa ito, naka-quarantine tulad ng milyong iba pa sa Metro Manila. Nagsimula noong Marso 15 ang tinatawag na community quarantine sa sentrong rehiyon ng bansa bilang tugon sa tumataas na bilang ng mga Pilipinong apektado ng Coronavirus Disease (COVID-19).
Sang-ayon ako sa desisyon ng pamahalaan na limitahan ang galaw ng mga tao papasok at palabas ng National Capital Region (NCR) sa loob ng isang buwan. Limitado rin ang galaw maging sa loob ng metro. Dagdag pa rito, ilang lungsod pa ang
nagpatupad ng curfew mula 8:00 ng gabi hanggang 5:00 ng umaga para sa buong buwan.
Ilang tao ang nagtatalo tungkol sa terminolohiya—isa ba itong community quarantine o isang lockdown? Para sa akin, hindi na ito mahalaga. Mas mahalaga na ipinatupad ito ng pamahalaan upang maprotektahan ang kalusugan ng publiko sa pagpigil sa pagkalat ng virus.
Hanggang nitong Marso 16, umabot na sa 140 ang bilang ng kumpirmadong kaso ng COVID-19 sa Pilipinas, kabilang ang 12 pagkamatay. Hindi natin dapat hayaan ang virus na ito na patuloy na kumalat tulad ng isang sunog. Kailangan nating masiguro na mahinto ang community transmission ng COVID-19. Lumaganap na ang virus na ito sa iba’t ibang bahagi ng mundo kung saan nakapagtala ng 80,849 kaso sa China, 24,747 sa Italy, 13,983 sa Iran, 8,162 sa South Korea at 7,845 sa Spain.
Nakarinig din ako ng ilang reklamo hinggil sa kalabisan ng hakbang na ito. Tunay namang hindi pangkaraniwan ang hakbang na ito. Ngunit ito ay isa sa mga pambihirang pagkakataon. Hindi
dapat tayo maglaro o isapulitika ang buhay ng mga taong nakataya. Kailangan natin itong ipatupad habang may pagkakataon pa tayo. Kung hindi natin mapipigilan ang pagkalat ng virus, maaari itong magresulta sa pagtaas ng bilang ng mga biktima na magbibigay ng malaking hirap sa ating sistemang pangkalusugan.
Tiyak na apektado ang negosyo ng quarantine at curfew. Habang isinusulat ko ito, maraming establisyamento na ang nag-anunsiyo na magsasara muna sila o babawasan ang oras ng kanilang operasyon. Sa aming kaso, nagdesisyon kaming pansamantala munang isara ang lahat ng Vista Malls at Starmalls sa NCR mula nitong Marso 16. Nagpatupad din kami ng sanitation at disinfection sa aming mga malls upang makapagbigay ng ligtas at malusog na kapaligiran para sa mga shoppers.
Napagdesisyunan namin ito dahil ito ang nararapat. Kailangan natin ang lubos na suporta ng pamahalaan upang mahinto ang pagkalat ng virus. Kalaunan magiging malinaw rin ang lahat ng mga hakbang na ito. Tiyak, na makakaapekto ito ng pansamantala ngunit kailangan nating
iprayoridad ang kalusugan ng bansa. Umaasa akong makalilikha ang Kongreso ng hakbang na susuporta sa mga mangagawa at maliliit na negosyanteng apektado ng mga hakbang na ito.
Sigurado ako na ilan ang nagrereklamo dahil sa pagkakulong sa kanilang mga tahanan. Ngunit isang napakahalagang hakbang ito upang matalo ang banta ng virus. At ang paggapi sa COVID-19 ay mangangailangan ng kooperasyon ng bawat isa.
Gamitinnatinangpanahongitoupangmuling makasama ang pamilya at mga mahal sa buhay. Magluto ng sama-sama, kumain ng magkakasama, manood ng Netfix ng magkakasama. Pagkakataon ito upang makapag-“reboot”. Ngunit higit sa lahat ugaliing isabuhay ang good hygiene. Huwag nang umalis ng bahay kung hindi naman mahalaga. Kung kinakailangan, mag-ingat at manatiling ligtas.
Ang pinakamainam na panlaban natin sa pagsubok na ito ay ang pagiging mapagmatyag at pagkakaisa. Kung matutulungan tayo at gagawin ang tamang paraan, tiyak na matatalo natin ang virus na ito.