DUQUE, NAKA- QUARANTINE
Nina MARY ANN SANTIAGO, BELLA GAMOTEA, LIEZLE BASA IÑIGO, at ORLY BARCALA
Kinumpirma mismo ni Department of Health (DOH) Secretary Francisco Duque III na kasalukuyan siyang naka-home quarantine dahil sa banta ng coronavirus disease 2019 (COVID2019).
Ayon kay Duque, nagpasya siyang mag-home quarantine matapos na ma-expose sa isang direktor ng DOH na una nang nakitaan ng sintomas at malaunan ay nakumpirmang nahawaan ng virus.
Naisailalim naman na umano si Duque sa pagsusuri ngunit dahil nakapila pa ang kanyang swab samples ay inaasahang aabutin pa ng mula dalawa hanggang apat na araw bago mailabas ang resulta nito.
Sa ngayon naman aniya ay nananatiling ‘asymptomatic’ o wala siyang sintomas ng sakit ngunit matinding pag-iingat aniya ang kanyang ginagawa dahil bukod sa asthmatic siya, ay mayroon na rin siyang altapresyon.
“Opo, naka-home quarantine po ako ngayon dahil na-expose po ako sa isang direktor ng DOH na nagpositibo sa COVID-19,” ani Duque, sa panayam sa radyo. “So far maayos naman ang aking pakiramdam, okey naman ako, wala akong lagnat, pero matinding pag-iingat po ang aking ginagawa dahil may altapresyon po ako at asthmatic.”
Tiniyak naman ng kalihim na naka-social distancing siya sa kanyang mga kasama sa bahay.
TULOY ANG TRABAHO
Tuloy rin aniya ang kanyang trabaho kahit nananatiling naka-home quarantine.
Paglilinaw pa ni Duque, wala namang dapat na ikabahala ang mga nakahalubilo niya na mga opisyal ng pamahalaan, partikular si Pangulong Rodrigo Duterte, at mga miyembro ng Inter Agency Task Force, dahil nagpapatupad naman sila ng social distancing ng hanggang tatlong metro sa kanilang mga pulong.
Hindi rin aniya sila nakikipagkamay sa isa’t isa, madalas na mag-alcohol, at hindi rin nila hinahawakan ang mga personal na gamit ng isa’t isa upang makaiwas sa virus.
Wala pa rin naman aniyang kasiguruhan kung positibo siya sa sakit dahil wala pang resulta ang COVID test na isinagawa sa kanya.
Sa ngayon aniya ay pinapalakas niya ang kanyang immune system at resistensiya sa pamamagitan ng paginom ng Vitamin C, calamansi juice, at pagkain ng mga gulay at prutas.
Paliwanag ni Duque, dahil wala pang gamot at bakuna kontra COVID19 ay ang mga antibodies lamang ng ating katawan ang siya ring papatay sa virus.
Pinayuhan rin naman ni Duque ang publiko na panatilihing malusog ang kanilang mga katawan para malabanan ang sakit.
Dapat rin aniyang sundin ng mga ito ang mga panuntunan ng DOH na manatili sa bahay, magkaroon ng proper hygiene, partikular na ang madalas na paghuhugas ng kamay na napatunayan na ng World Health Organization (WHO) na mabisang panlaban sa virus.
Mahalaga rin aniya na magkaroon ng proper cough etiquette, umiwas sa mga bisyo gaya ng paninigarilyo, at hindi na rin dapat na magpuyat at umiwas sa labis na stress, na siya aniyang nagpapabagsak ng resistensiya ng ating katawan.
Pinawi pa ni Duque ang pangamba ng publiko laban sa virus dahil mild lamang ang karamihan ng mga naitatala nilang kaso ng sakit at kusang nawawala ng hindi nangangailanan ng anumang lunas.
PINAY SA GREECE, NAGPOSITIBO
Mahigpit na binabantayan ngayon ng Embahada ng Pilipinas sa Athens ang kondisyon at kapakanan ng 10,193 Pilipino sa Greece.
Ito ay matapos kumpirmahin ng Department of Foreign Affairs (DFA) na may isang Pilipinang nagpositibo sa virus.
Ayon sa natanggap na ulat ng DFA mula sa Embahada ng Pilipinas sa Athens, ang nasbaing PInoy ay nakararanas ng ilang sintomas at nasa ilalim ngayon ng home quarantine.
Sa ngayon malapit ang koordinasyon ng embahada sa local health authorities sa Greece upang tiyakin na siya ay nabibigyan ng mataas na pangangalaga at suporta.
“The Embassy’s emergency number has been made available for the said Filipino,” ayon pa sa DFA.
Patuloy ang Embahad sa pagmomonitor ng sitwasyon sa lahat ng Pinoy sa Greece at handang magbigay ng ayuda kung kinakailangan.
43,218 PUM, IKU-QUARANTINE
Mahigpit na inutos sa 43,218 Persons Under Monitoring (PUMs) sa Pangasinan na sumailalim sa 14-day home quarantine upang maiwasan ang local transmission ng virus sa probinsiya.
Ito ang inihayag ni Dr. Anna Maria Teresa de Guzman, Provincial Health Office (PHO) chief, at sinabing mahigpit na binabantayan ng mga opisyal ng DOH sa Pangasinan ang nasabing mga PUM.
Sa kabuuang PUM, 732 ang nakapagkumpleto na ng 14-day quarantine period, ayon sa data mula sa rural health units ng town at city local government units.
Naitala naman ng PHO na aabot sa 24 Persons Under Investigation (PUI), at 12 admitted sa ospital at 12 discharged.
MAGULANG NG ‘BATANGKALYE’ IKUKULONG
Upang masigurong walang batang nakakalat sa lansangan, ikukulong o pagmumultahin ang mga magulang ng sinumang madadampot ng otoridad sa lansangan.
Ito ang babala ni Valenzuela City Mayor Rexlon Gatchalian sa kanyang talumpati kaugnay sa ipinatutupad na enhanced community quarantine upang mapuksa at maiwasan pang kumalat ng virus sa lungsod.
Sabi ng alkalde kung menor-deedad ang mahuhuli na nasa lansangan ay ipatatawag ang magulang at siyang magbabayad ng P5,000 o di kaya’y ikukulong.
May reklamong nakarating kay Mayor Gatchalian na napakaraming bata at pinababayaan lang ng kanilang mga magulang na maglaro sa kalsada, kahit pa nagpasa nan g ordinansa ang konseho kaugnay sa “stay at home “ordinance.
Sa pagsisimula ng pamamahagi ng libu-libong health kits kahapon, iniutos naman ni Taguig City Mayor Lino Cayetano na unahing pagkalooban ng ayuda ang halos 68,000 na senior citizens sa lungsod na vulnerable sa mga sakit partikular na sa pagkalat ng COVID-19.
Kahapon dakong 10:00 ng umaga nang umpisahang magbahaybahay ang mga tauhan ng Taguig government upang ihatid ang COVID-19 kits at grocery packs sa 2,667 senior citizens sa Barangay South Signal at apat pang kalapit na barangay.
Tiniyak ni Mayor Cayetano na maghahatid ang lokal na pamahalaan ng 2,000 grocery packs sa 28 barangay sa lungsod kada araw upang mapigilan aniya ang paglabas ng mga residente at maiwasang mahawa sa COVID-19. Kamakalawa ipinag-utos ng alkalde na isailalim na sa lockdown ang Taguig City upang mapigilan ang pagkalat ng nasabing virus.
10K PULIS, NAKA-DEPLOY SA C. LUZON
Aabot naman sa 10,000 pulis ang patuloy nagsasagawa ngayon ng checkpoint sa Central Luzon.
Ayon kay Police Regional Director Brigadier General Rhodel Sermonia, bawat awtoridad ay may dalang thermal scanner guns upang masuri ang mga pumapasok at lumalabas sa boundaries bawat lalawigan sa Central Luzon.
Nanawagan si Sermonia sa publiko na makipag-cooperate sa mga awtoridad na gumagawa ng paraan para makontrol ang pagkalat ng COVID-19 na isa ng pandemic sa bansa.
Sa ngayon ay may 23 PUI ang dinala sa iba’t ibang pagamutan ng Tarlac, kabilang ang isang residente ng Mangatarem, Pangasinan.