Tulungan ang dukha, kung nais proteksyunan ang mayaman

NAKIKITA na ng malaking grupo ng mga negosyante na ang COVID-19 na isyung pangkulusugan ay nagiging pang-ekonomiya na. Ang lockdown na inilapat na remedyo upang masawata ang pagkalat ng sakit ay nagsara ng mga negosyo. Nagiwan naman ito ng milyun-milyong manggagawa na nawalan ng trabaho. Nangangamba ang mga negosyante na sa pagpigil ng pagkalat ng sakit, ang magiging dulo ay kaguluhan at karahasan. Iminungkahi ng 32 business group na kumilos agad ang Kongreso at maglaan ng pondong magagastos sa panahon ng krisis at tulungan ang mga mahina at mahirap na komunidad. “Ang pangkalusugang isyu ay isyu rin ngayon ng kagutuman at maaari itong magdulot ng karahasan at mahabang tensiyong panlipunan. Kasi, ang kawalan ng trabaho ay nangangahulugan din ng buhay at kamatayan,” wika ng mga negosyante sa isang pahayag.

Tama sila. Maaaring iyong samasama nilang pahayag ay naghahayag na rin ng kanilang pangamba para sa kanilang mga sarili. At proteksyon din nila ang kanilang hinihiling sa mga kinauukulan. Kung nais kasi nating proteksyunan ang mga mayaman, tulungan natin ang mga mahirap.

Ang problema sa ating Kongreso na siyang inuudyukan ng mga negosyante na kumilos na bago mahuli ang lahat ay hindi kumikilos. Ang mga mambabatas ay may kani-kaniyang iminumungkahing solusyon, pero ang hangad lang nila ay mabasa at marinig sila. Tignan ninyo si Senate President Tito Sotto. Alam niya ang pagkagrabe ng problema. Aniya, “Pera ay pagkain. Pagkain ang seguridad. Seguridad ay kapayapaan at kaayusan. Imumungkahi ko sa Kongreso na magpasa ng food subsidy budget upang masustentuhan ang mga daily wage earners na nawalan ng kita.” Ang budget, aniya, ay nagkakahalaga ng P50 hanggang P100 bilyon na iminumungkahi niya kay Finance Secretary Carlos Domingez III, na inaasahan na tatalakayin niya ito sa Pangulo.

Nakahanda naman daw tumawag ng special session si Speaker Alan

Cayetano na ang layunin ay gumawa ng supplementary budget para gastusan ang pangangailangan ng mga higit na maapektuhan ng lockdown. Dahil ang mga mambabatas ay nananatiling nasa bansa sanhi ng mga ipinatutupad na hakbangin sa pagsawata sa pagkalat ng coronavirus, madaling makakuha, aniya, ng quorum. Kung apektado rin sila ng lockdown na nagbabawal ng paglalakbay, iyong mga mambatas daw na nasa malayong lugar ay gagawan ng remedyo para makaboto. Pwede silang bumoto sa pamamagitan ng telecommunication. Ganoon pala, ang pinamunuang Kongreso nina Sotto at Cayetano ay hiwalay at malayng departamento ng gobyerno, bakit hindi pa sila kumilos. Tumawag na sila ng special session upang makita naman ng mamamayan, lalo na iyong masyadong nahihirapan sa lockdown, kahit paano ay mayroon silang inaasahan na magpapagaan sa kanilang dinaranas ngayon.