PCSO, namahagi ng food packs sa PNP
Namahagi ang Philippine Charity Sweepstakes Office (PCSO) ng mga food packs para sa mga miyembro ng Philippine National Police (PNP) na siyang nagbabantay ng lahat ng entrance at exit checkpoints sa iba’t ibang lugar sa bansa, na bahagi ng ipinatutupad na enhanced community quarantine sa Luzon upang masugpo ang paglaganap ng coronavirus 2019 (COVID-19).
Ayon kay PCSO General Manager Royina Garma, ang mga food packs ay naglalaman ng mga biscuits, chocolate at milk drinks upang matiyak na magiging malakas ang pangangatawan ng mga naturang police frontliners.
Unang nabahagian ng food packs ay ang mga tauhan ng Eastern Police District (EPD) at National Capital Regional Police Office (NCRPO) na nagbabantay sa lahat ng entrance at exit checkpoint areas sa Luzon.
Sinabi ni Garma na nagpasya silang mamahagi ng mga food packs sa nga frontline policemen bilang pagpapakita ng pagkilala at pasasalamat sa sakripisyo nila para sa bansa.
Hinikayat rin naman ni Garma ang publiko na makiisa sa enhanced community quarantine at manatili lamang sa mga tahanan upang mabilis na masugpo ang lumalaganap na karamdaman sa bansa.
“Our modern heroes today implement very well their checkpoint operation guided with the policies on Enhanced Comminity Quarantine issued by President Rodrigo Roa Duterte to deter the possible spread of COVID-19, hence these people deserve to be recognized, appreciated and cared too,” ani Garma.
“In this trying times , health and safety of our frontliners remains our priority”, dagdag pa niya.