Nagpapakalat ng fake news, pananagutin

Hinimok ni Senador Win Gatchalian ang National Bureau of Investigation (NBI ) at ang Philippine National Police ( PNP)b na bilisan ang pagtugis, pag-demanda, at pagpapakulong sa mga nagpapakalat ng fake news.

Ayon kay Gatchalian, ang pagpapakulong sa mga taong nagpapakalat ng fake news ay magsisilbing babala para sa mga magdudulot ng takot at kalituhan ngayong nasa gitna ng isang public health emergency ang bansa.

Una ng inihayag ng PNP sa publiko na ang mga nagpapakalat ng fake news at maling impormasyon ay maaaring kasuhan ng paglabag sa Republic Act 10175 o Cybercrime Prevention Act of 2012. Sa Cebu, halimbawa, isang optometrist na diumano’y nagpakalat ng isang maling ulat ang kinasuhan ng paglabag sa Article 154 ng Revised Penal Code at ng Cybercrime Prevention Act of 2012.g.

“Imbes na makatulong sa pagbabahagi ng sapat at tamang impormasyon ngayong nasa gitna tayo ng krisis, nagiging sanhi pa ng kalituhan at kaguluhan ang mga nagpapakalat ng maling balita. Hangga’t wala tayong naipapakulong sa mga nagpapakalat ng mga kasinungalingang ito, patuloy ang mga taong ito sa kanilang paghahasik ng takot at kalituhan sa publiko,” ayon kay Gatchalian.

Nagbabala din ang mambabatas na dapat maging alerto ang publiko at mga otoridad sa iba’t ibang mga scam, pati na ang mga pekeng donation drives na maaaring maging talamak ngayong mahaba-haba ang panahon ng mga taong manatili sa bahay. Ayon sa kanya, dapat tugisin ng mga otoridad ang mga nasa likod nito.

Samantala, hinimok ni Gatchalian ang publiko na maging mapanuri sa mga ulat at impormasyon na kanilang natatanggap. Pinaalalahanan niya ang publiko na kumuha lamang ng impormasyon sa mga opisyal na mga plataporma at pahayagan ng pamahalaan at lehitimong mga organisasyon. Dagdag pa ng senador, maaaring labanan ng publiko ang pagkalat ng fake news sa pamamagitan ng pag-report sa otoridad ng mga maling ulat.