Aric, ‘King Tiger’ mentor, 80
PUMANAW na ang isa sa mga pinakamatagumpay na coach sa kasaysayan ng Philippine collegiate basketball at isa sa ‘charismatic’ mentor na si Januario “Aric” del Rosario.
Binawian ng buhay ang dating legendary mentor ng University of Santo Tomas kahapon sa edad na 80 dahil sa atake sa puso.
Naging maugong ang pangalan ni Del Rosario noong dekada 90 nang kanyang ihatid ang Tigers sa makasaysayang 4-peat noong UAAP Season 56-59 na kinabibilangan ng historic 14-game sweep noong 1993.
Tumagal pa siya sa UST hanggang Season 66.
Habang nasa UST, kinuha din siya bilang head coach ng koponan ng Pampanga Dragons sa nagsarang ligang Metropolitan Basketball Association (MBA) na napagkampeon niya sa unang edisyon nito noong 1998 habang nagsisilbi ding assistant coach naman ng Alaska sa PBA.
Bukod sa Aces, nakapagsilbi din syang assistant coach ng koponan ng Talk ‘N Text.
Nagsilbi din syang head coach ng national men’s basketball team noong 2003 Southeast Games na nagwagi ng gold medal sa pamamagitan ng 5-0 sweep.
Matapos ang pansamantalang pagriretiro at pagsisilbi bilang commissioner ng National Collegiate Athletic Association (NCAA) noong 2009-2011, bumalik sya sa pagiging coach para sa University of Perpetual Help System DALTA noong 2012-2015 at inihatid ang Altas sa tatlong Final Four appearances.
Ang huling koponan na kanyang hinawakan ay ang Parañaque noong 2018 sa MPBL.