Nakababahalang kaso ng early pregnancy
ISINIWALAT ng Civil Registry Statistics ng Philippine Statistics Authority (PSA) ang dalawang registered live births mula sa mga babaeng nasa 10 taong gulang lamang sa National Capital Region (NCR) at Region 4-A (Calabarzon), kapwa may mataas na populasyon.
Nakapagtala ang NCR ng 369 kaso ng mga batang ipinanganak ng ina na nasa edad 10 hanggang 14-anyos noong 2018, ngunit bumaba ang talang ito ng 6.5 porsiyento sa 345 rehistradong kaso noong 2019.
Bumaba rin sa 4.8 porsiyento ang kaso sa mga babaeng nasa 15 hanggang 19 anyos mula 20,613 noong 2018 patungong 19,614 noong 2019.
“Although (a) declining trend was observed in both age brackets, the case of a 10-year-old getting pregnant has sounded the alarm for all local government units to harmonize their efforts for stronger and better initiatives on adolescent reproductive health,” pahayag ni Commission on Population and Development (Popcom) - NCR Director Lydio Español Jr. nitong Martes.
Ikinababahala ni Español ang kaso ng 10-anyos na buntis na pasan ang dagdag na panganib sa kalusugan para sa sarili at sa kanyang anak, kabilang dito ang pre-term delivery at severe neonatal conditions.
Sa ulat ng World Health Organization, ang komplikasyon sa pagbubuntis at panganganak ang nananatiling pangunahing dahilan ng pagkamatay para sa mga babaeng nasa 15 at 19-anyos sa mundo.
Ang kaso ng Pilipinas bilang isang a developing country ay nagbibigay ng mas mataas na panganib sa buhay ng mga batang babae.
Habang ang kasalukuyang pandemya ay hindi lamang nagpalala ng hirap sa pagkuha ng prenatal at iba pang maternal services ngunit gayundin sa family planning services, na napakahalaga sa pagpapahupa ng kaso ng early pregnancies.
Sa isang pag-aaral ni Dr. Alejandro Herrin sa economic impact ng teenage pregnancies lumalabas na ang mga kabataang nagbubuntis ay mas mababa ang tiyansa na makumpleto ang secondary education, na nagreresulta sa malaking pagbaba ng kabuuang lifetime earnings.
Base sa PSA statistics, ang ulat ng panganganak ng mga kabataan ina na nasa edad 10 hanggang 19-anyos noong 2019 ay pinakamadalas sa Quezon City (4,246), Manila (3,782), at Caloocan City (2,429), habang ang Pateros at San Juan ay may 95 at 100, na kaso.
Bilang tugon, nakipagtulungan ang Popcom-NCR sa Zuellig Family Foundation para sa pagpapababa ng kaso ng teenage pregnancy sa pamamagitan ng The Challenge Initiative (TCI) project. Napili ang mga lungsod ng Quezon, Manila, at Makati para sa paglulunsad ng TCI sa Metro Manila.
Ang unang dalawang lungsod ang may pinakamataas na insidente ng maagang pagbubuntis sa rehiyon habang nagpahayag naman ang Makati ng interes sa proyekto.
Titingnan din ng Popcom ang Social Protection Program para sa mga batang ina at kanilang mga anak, na makakatuwang ang Department of Social Welfare and Development sa implementasyon.
Layon ng programa na makapagbahagi ng holistic interventions sa mga minor parents at kanilang mga anak.
Dagdag pa ni Español, upang magbunga ng magandang resulta ang programa, kinakailangan ang pagtutulungan ng mga stakeholders, kabilang ang mga pribadong sektor, akademya at barangay.