Ipinagkibit ng balikat
MAAARING ako ay naalimpungatan lamang, subalit malinaw ang pagkakadinig ko sa isang ulat kamakailan: Tatlong porsiyento na lamang ng mga barangay sa buong kapuluan ang hindi maituturing na illegal drug-free. Ibig sabihin, halos lahat ng 42,000 barangay sa ating bansa ay ligtas na sa mga users, pushers at druglords na mistulang sumisira sa pamumuhay ng ating mga kababayan, lalo na ng mga kabataan.
Hindi ko matiyak ang pinagbatayan ng gayong pananaw.
Kabilang ako sa mga natitiyak kong nagkibit-balikat sa naturang ulat. Nakaangkla ang aking paninindigan sa pinaniniwalaan kong kaliwa’t kanang drug raids na isinasagawa ng ating mga alagad ng batas -- mga pagtugis sa mga sugapa sa mga bawal na droga na kung minsan ay ikinamamatay ng mga suspek lalo na kung sila ay nanlalaban.
Hanggang ngayon, nadidiskubre pa rin ng mga awtoridad ang mga laboratoryo ng shabu, tulad ng drug lab sa isang bayan sa Zambales na sinasabing pinamamahalaan ng opisyal at tauhan ng Philippine National Police (PNP). Isa itong ulat na totoong nakadidismaya lalo na kung iisipin na ang mga alagad ng batas ang dapat mangalaga sa seguridad ng mga komunidad at ng sambayanan.
Magugunita na sa pagsisimula pa lamang ng Duterte administration kaagad lumutang ang estadistika na 92 porsyento ng mga barangay sa buong bansa ang pinamumugaran ng mga sugapa sa bawal na droga, nangangahulugan na talagang talamak na ang shabu kahit noon pang nakaraang mga administrasyon.
Dahilan ito kung bakit sa pagsisimula pa lamang ni Pangulong Duterte sa kanyang tungkulin, una niyang binigyang-diin ang paglutas sa problema sa illegal drugs. Kaakibat ito ng nakagawian niyang paghamon: Yayariin ko kayong lahat. Naniniwala ako na ang gayong pahayag ay bunsod ng kanyang matibay na determinasyon na lipulin ang mga nalululong sa shabu at iba pang bawal na gamot; ang naturang masasamang elemento ng lipunan ang balakid sa kanyang hangaring lumikha ng matatag at malinis na gobyerno para sa mga mamamayan.
Subalit mismong Pangulo ang umamin na hindi niya kayang lutasing mag-isa ang malubha at talamak na problema sa droga; nanawagan siya ng suporta sa mismong mga taumbayan na damayan siya sa paghahanap ng solusyon sa pagpuksa ng salot na pumipinsala hindi lamang sa ating bansa kundi maging sa iba pang lupalop ng daigdig.
Tulad ng laging binibigyangtinig hindi lamang ng Pangulo kundi maging ng halos lahat ng sektor ng sambayanan, ang kailangan ay totohanan at nagkakaisang pagsisikap ng lahat sa paglipol ng users, pushers at druglords -- kasabay ng paglipol sa mga shabu smugglers at ng mismong ilang tauhan ng gobyerno na sinasabing utak at pasimuno sa pagpupuslit ng mga illegal drugs.