MABUTING BALITA
Is 65:17-21 • Slm 30
Noong panahong iyon, umalis si Hesus sa Samaria at nagtungo sa Galilea. Sapagkat si Hesus na rin ang nagsabing ang isang propeta’y hindi iginagalang sa kanyang sariling bayan. Pagdating niya sa Galilea ay mabuti ang pagtanggap sa kanya ng mga tagaroon, sapagkat nasa Jerusalem din sila noong Pista ng Paskuwa at nakita nila ang lahat ng kanyang ginawa roon.
Nagpunta uli si Hesus sa Cana, Galilea. Doon niya ginawang alak ang tubig. Doon naman sa Capernaum ay may isang mataas na pinuno ng pamahalaan; at may sakit ang kanyang anak na lalaki. Nang mabalitaan niyang bumalik si Hesus sa Galilea mula sa Judea, pinuntahan niya ito. Pinakiusapan niya itong pumunta sa Capernaum at pagalingin ang kanyang anak na naghihingalo. Sinabi sa kanya ni Hesus, “Hangga’t hindi kayo nakakikita ng mga palatandaan at mga kababalaghan, hindi kayo mananampalataya.” Ngunit sinabi ng pinuno, “Tayo na po, Ginoo, bago mamatay ang aking anak.” Sumagot si Hesus, “Umuwi na kayo; magaling na ang inyong anak.”
PAGSASADIWA:
“Naniwala ang lalaki sa salita ni Hesus at umuwi nga siya.”—Sa ebanghelyong ito, isang pagano ang nagtuturo sa atin kung ano ang tunay na pananampalataya. Nanalig ang mataas na pinuno sa mga salita ni Hesus kahit hindi nakita ng kanyang mga mata kung paanong pagagalingin ni Hesus ang kanyang anak.
Sa mundong ito, gusto natin lagi ay iyong nakikita lang natin. Gusto natin yung nakasisigurado tayo. Kaya nga dumarating sa pagkakataon na nagiging balisa tayo kapag hindi na natin kontrolado ang mga pangyayari sa buhay. Bagama’t masasabi nating mabuti na ang nakasisiguro, kailangan nating tanggapin na hindi lahat ay sigurado. Maraming mga bagay ang hindi natin tiyak. Dahil dito, kailangan nating tanggapin ang katotohanang ang Diyos ang may hawak sa ating buhay. Kaya magtiwala at manalig tayo sa kanya kahit hindi natin siya nakikita. Kung hindi man tayo makasigurado sa kahihinatnan ng ating buhay, isang bagay ang makatitiyak tayo at iyon ay ang katotohanang hindi tayo pababayaan ng Diyos. Si Hesus mismo ang nagsabi: “Huwag kayong matakot. Kasama ninyo akong lagi hanggang sa wakas ng panahon.”