Nakagugulat, biglang pagdami ng kaso ng COVID-19

NAKAGUGULAT ang biglang pagdami ng mga kaso ng COVID19 sa minamahal nating Pilipinas. Akalain ba natin na noong Biyernes, nakapagtala ang Department of Health (DOH) ng 7,103 kung kaya sumikad sa 648,066 ang mga kaso sa buong bansa. Ang pinakamaraming kaso ay nairekord noong Agosto 10 na 6,958.

Sinabi ng isang opisyal ng World Health Organization (WHO) na ang biglang pagdagsa o pagsipa (surge) ng impeksiyon ay naobserbahan din at nangyayari ibang bahagi ng mundo. Posible umano na dulot ang surge ng tinatawag na “vaccine optimism” dahil sa pagsisimula ng pagbabakuna o rollout.

Nakapagtala rin ang mga pinuno ng DOH ng 73,264 aktibong kaso noong Biyernes, pinakamarami sapul noong Agosto 29,2020 nang 74,74,611 ang naiulat. Tumaas din ang bilang ng mga namatay na 12,900 matapos bawian ng buhay ang 13 pasyente. Gumaling naman ang may 561,902 matapos maka-recover ang 390 noong Biyernes.

Sa ating mga kababayan, sana ay panatilihin natin ang pagtalima sa mga protocol sa kalusugan na lagi nang inaanunsiyo ng mga eksperto ng DOH. Hindi komo meron nang bakuna na dumating sa ating bansa ay puwede na tayong mag-relax at maging kalmante. Alisin natin ang “COVID o pandemic fatigue.”

Para kay Davao City Mayor Sara Duterte, anak ni Pres. Rodrigo Roa Duterte (PRRD), ang inilunsad na 1SAMBAYAN sa pangunguna ni ex-Supreme Court Senior Associate Justice Antonio Carpio, ay maituturing na authoritarian dahil ibinabando nila na ito ay koalisyon ng mga demokratikong grupo/puwersa, pero tinatanggihan naman nila ang sumasalungat sa kanila.

“Parang ang dating nila sa akin ay authoritarian. Kung nais nilang magtagumpay, dapat manawagan sila ng pagkakaisa,” ani Inday Sara.

Sa pangunguna ni Justice Carpio, sinabi ng 1Sambayan na ito lang ang tanging genuine o lantay na nagkakaisang oposisyon na maaaring manalo laban sa kasalukuyang administrasyon. “Nagpasiya kami na piliiin ang mga kandidato para sa pangulo, pangalawang pangulo at senador. Ang mga grupo at partidong pulitikal sa oposisyon ay nangako ng kanilang suporta sa 1sambayan at nagkasundong tatalima sa pagpili sa mga kandidato.”

Sakali kayang mapatunayan na sina presidential spokesman Harry Roque at PNP chief Gen. Debold Sinas ay lumabag sa COVID19 protocols, sila kaya ay talagang mananagot o iaabsuwelto na naman ni PRRD? Iyan ang tanong sa akin ng dalawang kaibigan sa kapihan.

Ang tugon ko: “Hindi ko alam.”

Itanong ninyo kay Sen. Panfilo “Ping” Lacson dahil sinabi niya na dapat managot sina Roque at Sinas sa paglabag!