MABUTING BALITA
Blg 21:4-9 • Slm 102
Noong panahong iyon, sinabi ni Hesus sa mga Pariseo: “Ako’y yayaon; hahanapin ninyo ako, ngunit mamamatay kayo sa inyong mga kasalanan. Hindi kayo makapupunta sa paroroonan ko.”
Sinabi ng mga Judio, “Magpapakamatay kaya siya kaya niya sinasabing, ‘Hindi kayo makapupunta sa paroroonan ko?’” Sumagot si Hesus, “Kayo’y tagaibaba, ako’y taga- itaas. Kayo’y tagasanlibutang ito, ako’y hindi. Kaya sinabi ko sa inyo na mamamatay kayo sa inyong mga kasalanan. Mamamatay nga kayo sa inyong mga kasalanan kung hindi kayo maniniwalang ‘Ako’y si Ako Nga.’ ”
“Sino ka ba?” tanong nila. Sumagot si Hesus, “Ako’y yaong sinabi ko na sa inyo mula pa noong una. Marami akong masasabi at maihahatol laban sa inyo. Ngunit totoo ang sinasabi ng nagsugo sa akin, at ang narinig ko sa kanya ang ipinapahayag ko sa sanlibutan.”
PAGSASADIWA:
“Ako’y yayaon; hahanapin ninyo ako, ngunit mamatay kayo sa inyong mga kasalanan.”— Malapit nang mamatay si Hesus sa krus. Hahanapin siya ng mga taong sumusunod sa kanya ngunit dahil sa kakulangan ng kanilang pananampalataya maaring manatili sila sa kanilang mga kasalanan. Ang pananampalatayang Kristiyano ay hindi lamang nasa isip, at salita kundi nasa gawa rin.
Sa totoo lang, hindi naman natin itinatakwil ang mga turo ng ating Panginoong Hesus. Hindi naman natin talaga tinatalikuran si Hesus. Ang totoong problema ay hindi natin kayang tanggapin ng buong-buo ang turo ng ating Panginoon. Nagdarasal tayo pero mas pinipili pa rin nating magkasala. Nagsisimba tayo tuwing araw ng Linggo ngunit pag- uwi ng bahay balik tayo sa dating ugali. Ang ating pananampalataya ay isang desisyon na gagawa tayo ng mabuti at tama kahit alam nating mahirap. Ang ating pananampalataya ay ang lakas loob nating pagsasabuhay ng mga itinuro ng ating Panginoong Hesus.