PH ‘di na bibigyan ng bakuna kapag maraming ‘singit’

Inatasan ni Pangulong Rodrigo Duterte ang Department of Health (DOH) na siyasatin ang mga taong sumigit sa pila ng pagbabakuna at nakatanggap ng bakunang coronavirus (COVID-19).

Ginawa ni Duterte ang pahayag matapos itong maiulat na limang alkalde at isang artista ang nabakunahanna habang ang gobyerno ay hindi pa nakukumpleto ang pagbabakuna sa 1.7 milyong mga healthcare workers.

Sa kanyang pampublikong pahayag noong Miyerkules ng gabi, sinabi ng Pangulo kay Health Secretary Francisco Duque III na imbestigahan ang mga lumaktaw sa pila.

“Make a report out of that incident and idiretso mo na lang sa Ombudsman,” sinabi niya kay Duque.

Ayon sa Pangulo, mahalaga na istriktong sumunod ang Pilipinasa sa vaccination priority list upang patuloy na suportahan World Health Organization (WHO).

“Sinabi na sa atin ng country representative of the WHO: ‘If you do not follow the list of priority, you might lose the assistance of the WHO,’ It was made clear to us,” aniya.

Ang Pilipinas ay nakatanggap ng 525,600 na dosis ng mga bakunang AstraZeneca mula sa COVAX Facility na pinamunuan ng WHO.

5 mayor pinagpapaliwanag Pinagpapaliwanag ng Department of Interior and Local Government (DILG) ang limang alkalde na sumingit sa pila ng bakuna.

Sa inilabas na listahan ni DILG Usecretary Epimaco Densing III, binigyan din nito ng show cause order sina Tacloban City Mayor Alfred Romualdez na nabakunahan noong Marso 22; T’buli South Cotabato Mayor Dibu Tuan na nabakunahan noong Marso 19; Sto. Niño South Cotabato Mayor Sulpicio Villalobos na nabakunahan noong Marso 19; Legaspi City Albay Mayor Noel Rosal na nabakunahan noong Marso 16 at Bataraza Palawan Mayor Abraham Ibba na nabakunahan noong Marso 22.

Hindi pa isinasapubliko ng DILG ang posibleng ipataw na parusa laban sa limang local chief executive.