Siak ni Precious (50)
“Makisinnarakak kadakuada,” kinuna ni Precious. “No matayak, kas kinunak idi, kukua ni Rosie ti apartment….”
Ti Napalabas: Agkikita koma da Rosie, Denver, ken Boy Manok ngem adda nangala ken ni Rosie ket inlemmeng iti Roquero Riverside. Tallo met a lallaki ti nangpanggep a mangkidnap ken ni Precious ngem tinulongan dagiti tao ni Boy Manok. Nagtarusda iti Roquero Riverside. Pinasukon ni Precious ni Denver ket impudnona nga ammona nga asset ti polis ken dinamagna no sisasagana a makitinnulong kadakuada. Immannugot ni Denver. Imbagana pay a dagiti kakaannakanna a taga-Libertad ti akin-aramid kadagiti mapaspasamak kenkuana. Sinalangad ni Precious ni Reinford ket natungpana. Idi makaawid, impudno ni Jepoy a desperadon dagiti kakasinsinna a mangpatay kadakuada— agraman ni Rosie. Pinagsaganana ida. Mapanda koma ilemmeng da Jepoy iti Roquero Riverside ngem maysa a kotse ti nangbalagbag iti dalanda.
“KUMPETKAYO!” imbilin ni Boy Manok. Apagsaona, nakangngegak iti kanalbaag. Indungpar gayam ti drayber ti nagluganan da Jepoy ken Manang Nida ti sidecar-na iti kotse. Inalistuan met ni Boy Manok nga inawid met laeng iti kanigid ti manibela ti sidecar ta adda sumungad a bus. Nakaat-atiddog ti napigsa a bosinana ngem adda iti kotse ti imatangnmi amin.
Pagam-ammuan, adda manen nanakraad. Dinungpar met ti sidecar a nagluganan da Denver ti bakrang ti kotse. Uray la a nagiri ti lalaki a dumsaag koma iti kotse. Inkidemna pay ti panagituredna iti sakit ngata a nariknana iti pannakaipit ti bagina iti ridaw ti kotse. Urayto pay ngamin siak ket napadiwigak iti nakitak a pannakaipitna.
Ipagarupko no idungpar met ti Boy Manok ti naglugananmi ngem insardengna ketdi iti sango ti kotse, iti sakbay ti salogan, sa nagdardaras a dimsaag. Uray ni Denver, nakitak ti ididissaagna. Kasta met dagiti drayber dagiti naglugananmi. Nagturongda iti kotse. Alisto dagiti garawda.
Intungrarawko ti ulok iti sidecar. Grabe gayam ti pannakaipit ti lalaki a rummuar koma itay. Ngem adda gayam kakaduana. Nakulogda siguro iti panangdungpar dagiti kakadua ni Boy Manok iti luganda ta malasin nga al-alawenda pay laeng ti bagida.
Inlukat ni Boy Manok ti saan a nakippit a ridaw ti kotse. Ginaw-atna ti ulo ti maysa kadagiti lallaki iti uneg sa intumegna iti bakrang ti kotse. Napakidemak ta maalinggagetak, ket diakon ammo ti inaramid ni Denver iti gawgaw-atenna met itay. Basta nakangngegak iti sumagmamano a kanalbuog. “Rosie... Rosie…” Nagmulagatak. Ni gayam Denver. “Dumsaagkayon ta magmagnatayon,” kinunana.
“Diak kayat,” inkitakitko. “Al-alisto a makamatandatayon, a, no kua.”
“Tulog na po silang lahat,” insalpika ni Boy Manok.
Kinitak ti kotse. Salungayngay nga agpayso aminen dagiti lallaki iti uneg. Dimsaagak met laeng iti sidecar. “Kailangang maghiwa-hiwalay tayo,” kinuna ni Boy Manok. “Baka may kasama pa sila. Para maligaw sila kung saka-sakali.”
“Saan kayo didiretso?” kinuna ni Precious. “Sa Maricaban, bossing.” “Sige, ipunin mo ang mga kasamahan
natin at doon tayo magkita-kita mamaya. Kailangang matapos na ito.”
Inuray pay nga immuna da Boy Manok a makaadayokami iti EDSA sakbay a nagpanawda. Medio pataray ti pannagnami ta dagdagdagennakami ni Precious. Amangan kano no makariing dagiti adda iti kotse. “Adda paltogda?” dinamagko. “Awan. Siguro, sisiimendatayo laeng,” ni Denver ti simmungbat. “Asino ngata ti akinkadua kadagidiay?” kinunak. “Saan met ngarud a kadua da Insan Reinford dagidiay.” Ni Jepoy. “Ita laeng a makitak ida.”
“Ti ngarud sindikato a tinakawanda ti akintao kadagidiay.” Ni manen Denver. “Alistuanyo. Ad-adda a delikadoda ngem dagiti kakasinsinyo.”
Dandani saanak nga immanges agingga a saankami a nakadanon iti dakkel a balay iti Roquero Riverside.
DIAK insina ti panagkitak ken ni Precious. Itay pay a di makatalna. Pagna a pagna ken dayal a dayal iti selponna. Namindua ngaminen a pinuted ti kasarsaritana ti saritaanda. Nagturong iti beranda ti maikadua a kadsaaran a ‘yanmi a nakasulluop ti selponna iti lapayagna. Nagsammaked iti barandilias sa timmannawag iti baba.
Timman-awakon dita itay. Awan nakitak no di scrap a lanlandok kada aglatlatin ken saanen a mabalin a partes ti motor ken kotse. Siddaawek ti kaaduna. Kasla pabrika. Diak la ket ngarud nagawidan ti bagik a nagdamag iti lalaki nga agbambantay iti balay. Ni laeng Precious ti saan a sisasango kadakami.
Dati gayam a bodega dagiti carnapper daytoy a disso. Awan mangipagarup nga adda kasta ditoy ta saan a makastrek ti lugan malaksid iti motor. Gayam, ibalsada iti rabii ti kotse sa ingatoda babaen ti kararit. Ditoy metten ti ‘pangpartianda’ sa ilakoda dagiti piesa daytoy. Ngem napatayda ti lider ti grupo ket naisardeng ti operasionda. Inabandonarda ti lugar. Agingga a nagbalin nga apon dagiti drug addict ken dagiti aglaklako iti mabaybayadan a ragsak dita Rotonda.
“Paset kano ti Banana Island daytoy idi,” innayon ni Denver. Siguro, naammuanna dayta iti panagdamdamagna. Uray siak ket nangnangngegkon dayta kunkunada a Banana Island a ‘nababa a langit’ ngem diak ammo no sadino ti ‘yanna. Ita, masmasdaawak no kasano a nagbalin nga ‘island’ idinto a ti met la bassit nga estero itan ti ‘yan ti danum.
Manmano kanon ti addict ditoy Roquero Riverside. No adda man, saan nga iti uneg ti compound a ‘yanmi ti pakasarakan. Adu ti mangnginum ngem awan ti addict.
Nagatang gayamen ni Precious daytoy a compound. Ket daytoy balay a ‘yanmi, dati a balay ti carnapper. Ngem manmano kano nga umay ditoy ni Precious. Pagturturogan dagiti awan pagturoganna ti balay. Dagiti nakitak idi nga agiinum, nabayag kanon ditoy ti kaaduan kadakuada. Saan a pinapanaw ni Precious ida iti maysa a kondision: awan ti agusar iti maiparit nga agas. Ti matiliwan, pagtalawenna. Adu ti nagtalaw, adu met ti napapanaw. Dagiti nabati, inikkan ni Precious iti mabalin a pagsapulanda. Inggatanganna ida iti sidecar a saan a masapul nga agtinnagda iti boundary ngem masapul a patarimaanda ti madadaelda. Isu met laeng a kasta laengen no isakitda ni Precious. “Pasalamat kami at hindi pinatayuan ni bossing ng apartment ‘to. Para daw sana sa kanyang mga pamangkin na nag-aaral at sa mga kamag-anak na pumupunta sa abroad,” kinuna pay ti para bantay iti balay.
Nagkikinnitakami pay kada Manang Nida, Jepoy, Kring Kring ken Denver.
Adda gayam plano ni Precious a kastoy? Kaasi met. Saanda la ketdi ngaminen a maawawatan ti ugalina.
Natiagak iti irarayok ti timek ni Precious. Kimmitaak iti ‘yanna.
“Saan a siak ti butbutngenyo!” inyikkisna iti kasarsaritana iti selpon. “Ibagbagak kadakayo, no didak tulongan, paibaludkayo amin nga agaama!” Imbatona ti selpon iti kutson a kakaisuna a tugaw iti beranda. Tugawna siguro nga agpapaangin no kua.
Ammok lattan a maysa kadagiti kaannakanna iti Libertad ti kinasaritana. Inasitgak. “Ania ti damag?” kinunak. “Ipapilitda nga adda kaniak ti sapsapulenda a droga.” “Ket?” “Kayatda nga agsasangokami.” “Ket no saan?” “Papatayendak kano.” Diak nakatimek. Ket no agkikitada, ania ti mapasamak ken ni Precious? Papatayenda la ketdi adda man itedna a droga wenno awan.
“Ania ngarud ti planom?” nagpaliar ti timekko. Diakon nailemmeng ti danagko.
Immanges iti nagsasaruno a nakaat-atitiddog sa madamdama, nagdayal.
“Hello, Boy?” kinunana. Ni Boy Manok la ketdi dayta kasarsaritana. “Nakahanda ka bang tumulong sa akin? Baka mamamatay na ako…” Nagrarek ti timekna ket aglua metten. Maisursurotak iti panagluana. “Lahat kayo? Maraming salamat…” Impunasna ti dua a ramay ti kanigidna iti angedna. “Hindi na ako makakapunta dyan. Kung puwede mag-utos ka ng pupuntang magbantay sa bahay. ‘Yong iba, punta rito sa Roquero…”
Nalpasdan a nagsarita ken ni Boy ngem diak pay nakatimek. Buybuyaek lattan ni Precious a nakaul-ulimek a mangsingsinglot iti angedna. “Ayabam da Denver ken da Manang Nida ta agsasaritatayo…” Nagtungpalak. Saanen a nagpalpalikaw pay ni Precious apaman a nakapagtitiponkami. Imbagana ti pangta ti sindikato. “Ania ti maibalakadmo, Denver?” sinango ni Precious ni Denver. Kinuti ni Denver dagiti abagana sa naglibbi. “Awan madesionak… Ngem nakasaganaak a tumulong.”
“Kabaelam kadi a kontaken dagiti kakaduam a polis wenno ti PDEA tapno tumulonganda?” “Adda kakaduana a polis?” masmasdaaw a kinuna ni Jepoy. “Asset,” kinunak. “Polis ken PDEA.” Siddaaw ti nayurit iti rupa dagiti agiina. “Isu ti ur-urayenda,” kinuna ni Denver. “Ania kadi ti plano?” “Makisinnarakak kadakuada,” kinuna ni Precious. “No matayak, kas kinunak idi, kukua ni Rosie ti apartment. Ken isu ti agbalin nga administrador dagiti sanikuak para kadagiti amin a kakabagiak.”
Diakon napengdan ti nagbaningrot.