Ti Biag ni Don Pobre, Taga-Nagcayangan
Naimas ti pansit batil-patong. Ngem para kenkuana, naim-imas ti isem ken perreng ni Katrina.
IMPUSOTKO ti bagik iti butuabutuag iti salas kalpasan a nayakarko ti channel ti 32 inches a LED a telebisionmi iti GMA 7. Tengngat’ aldaw. Kalkalpasko a nangan ket pagpalpaak ti agbuya iti “Eat Bulaga.” Maayatanak met ngaminen nga agbuya iti Aldub, ti kalyeserye iti telebision a kanayon a buybuyaen dagiti kakaarrubami ditoy Nagcayangan— a pangliblibbiak kadakuada idi ta kasla la ketdin agtutubo wenno agkabannuagda a makilkilig, pasaray buyoganda pay ti kasla mapagpagustuan a katawada iti ikkis; gayam, nagmayat met a pagpalpaan aglalo no kastoy nga agsasaruno ti tig-ab uray tinuno la a blue marlin daytay inan-anusak a sinda. Makauma met ngamin ti kanayon a karne. Agumaakto manen iti kappukan ken pinapaitan inton bigat nga idadagas ‘tay taga-Ballesteros a paggatgatangak iti karne ti baka. Apagisunto pay a mairuarko iti Cebuana ‘tay paw-it ni baket nga aggapu idiay Hong Kong.
Diak insina ti panagkitak ken ni Yaya Dub wenno Maine Mendoza. Agkalanglangada la unay ken ni Katrina nga anak ni Kagawad Dexter. Amin a panagdiwigdiwig ken panagdakkedakkel dagiti mata ken agong, agpadada. Cute! Nakagangganas a pidilen dagiti pingpingna.
Idissok koman ti remote control iti magawgaw-atko a lamesita idi pagammuan la ta pessaan ti ridaw ti katugangak a babai. Purked ken adda pugpugotna a baket. Ngem naardiod. Uray adda la iti balayda (maysa a balay laeng ti baetmi), dina maikkat ti naubon-ubon a dadakkel ti tinukelna a balitok a kuentasna ken ti kasla pulseras ti ubing ti kadakkelna nga aritosna. Napudaw ketdi ti rupana ta rinabiin sa a gusugosanna iti no ania ditan a pagpapudaw. Ngem no kitaem ti tengngedna, mapalibbika la ketdi ta nangisiten manipud dita agpababa. Dagiti kukona a sigud a ladog ti nangkalupkop, naka-nail art a kunada itan. Pati panagkawkawes, saanen a kas kadagiti gagangay a babbaket ditoy lugarmi a simple laeng. No dayoka ditoy ket damom a makita, mapagbiddutam la ketdi a donia ti katugangak.
“Ne, alaem daytoy, Don, barok,” indiayana ti bitbit ti kanawanna a naka-plastic bag. Sabali laeng ti bitbit ti kanigidna. Pilawek idi