Maikadua a Sabado
gayam ita ti Pebrero, ‘imbag ta nagtekska a sabtenka dita haywey, kasla kaano laeng ‘di lunes nga intulnogka iti daytoy met laeng a haywey. awan man iti lagipko-- lima nga aldaw itan a diak nasibugan dagiti paboritom a masetas kasla mangmangngegko manen ti panagaritattatmo no mariingamto iti kabigatan ti domingo a silalaylay manen dagiti mulam iti hardinmo no apay a natig-anan ken narsaak manen dagiti rosas iti pay met ngarud kaaldawan dagiti puso, piman. malagipko man ita ti kanayon a daydayengdengam no apay a kasla kabakiran dagiti wara iti aglawlaw papel, selopin, bulbulong ken ukis ti la adda ken no ania la ditan no ay-ayam wenno basura wenno natuktukkol a sagad ken nakupkuppit a dustpan a nagang-angawan nga inay-ayam da anib ken siding.
no ilistak koma ti inar-aramidko bayat ti kaawanmo agbettakda a kasla umel a ripppiis dagiti labutab dagiti diak mapagmukmukas a mantsa dagiti lupot idinto a sidadagumpo pay laeng iti planggana dagiti sikukupin a lupot a diak pay naisalansan iti kabinet. sipaplangganita iti lababo, ti maugasan a lunglongan a pasaray karaykayen dagiti manok wenno siblokan ti pusa idinto nga iti abay ti bayog, agur-uray ti pasaherok itay pay a nagteks— maladaw kanon iti trabahona. no naitulnogkon ‘tay inauna, pakanen ken digosek ‘tay maikadua, darasdaras no kasta a maladawen ket bayat nga isalsalapaykonto dagiti isem ken suron kadagiti annakmo a di makakupin wenno makasagad wenno agalikumkom koma kadagiti wara iti paraangan wenno makaugas koma uray baso ken pinggan iraprapinko a palayasan ti paboritom a pomelo iraprapinko a ganaganan ti paboritom a dragon fruit agburburasak kadagiti tarong a kaay-ayom a tortaen wenno pakbeten a laokam iti kaay-ayok a tinuno a tilapia.
ket bayat nga agsansanengseng ti ipabpaburekko a danum a pangep-ep iti bannog ken utoymo a nagbiahe malaglagipko ti ayan-ayat da ngadas ken dawatdawat agkabbalayda iti agnanayon.
--DANIEL L. NESPEROS