Saludsodem ken ni Apo Hues
SALUDSOD:
Limakami nga agkakabsat. Napan dagiti nagannak kadakami idiay Amerika ket nagyanda sadiay iti nabayag a panawen. Adda sanikuada sadiay (balay, lote ken dua a parsela a daga). Idi natay daydi inangmi, adda nangkadkadua iti amami a kailianmi nga agnaed met sadiay Amerika. Idi pimmusay ti amami idi 2007, nagawid ditoy Filipinas ti kailianmi ket nangipatakder iti balayna iti lugarmi ken gimmatang iti dagdaga.
Sinaludsodmi kenkuana no ayannan dagiti sanikua dagiti pimmusay a nagannak kadakami. Imbagana a nalakona kanon. Idi alaenmi ti bingaymi, kunana a nagastosna amin iti agas, pannakayospital ken panangtaripatona iti daydi tatangmi.
Dimi patien a kasta. Inikkanna iti mano laeng a ribu ti dua a kakabsatmi; dakami a tallo, dimi inawat ti it-itedna ta mabassitankami.
Suspetsami a ti nangalaanna iti pinagbalayna ditoy lugarmi ket ti naglakuanna iti sanikua dagiti dadakkelmi. Idi 2009, nangyulikami iti darum kontra kenkuana iti Regional Trial Court iti “sum of money and accounting of the property of the deceased.”
Ngem manipud idi agingga ita, tallo pay laeng ti naiparang kadagiti lima a testigomi. Ngamin, masansan a maisanud ti bista. Paisanud ti abogado ti naidarum; no dadduma, ti met abogadomi ti agpaisanud. No dadduma, awan ti hues a mangbista. No saan, nakaladladawkami a mangrugi.
Kasano daytoyen, Apo Hues? Pito a tawenton ngem kastoy lattan. Kaanonto ngata a malpas ti kasomi?
Tulongannakami man no kasano a mapadaras ti pannagna ti kasomi ta babbaket ken lallakaykamin. Amangan no nataykaminton, dimi pay la nalpas ti kaso. –Agkakabsat iti I. Sur
SUNGBAT:
Talaga a kasta ti pannagna ti kaso ditoy pagiliantayo. Kasla pag-ong. Husto ti kunayo, masansan a maisanud ti bista; no dadduma, awan ti hues, wenno maladaw a marugian ti bista.
Ammoyo, adda pay ngamin dagitay korte nga adu ti bistaenda a kaso iti uneg ti maysa nga aldaw laeng. Ket no maladaw a mangrugi ni Apo Hues, kas pagarigan pasado alas nuebe wenno dandanin alas dies iti bigat, dandaninton tengnga ti aldaw no malpas a maibasa ti kalendario ti kaso iti dayta a bigat. Mabalin nga adda mabista ngem maysa wenno dua la ngatan. Ket dagiti kaso a sibil a kas iti kasoyo, maud-udi ta yun-unada dagiti kaso kriminal aglalo no nakapupok ti akusado.
Adda nga agpayso ti Akta Republika 4908 (Law on Speedy Trial) a mangpapardas iti pannakabista ti kaso (masapul a malpas ti bista iti uneg ti tallo wenno innem a bulan, ken madesisionan iti uneg ti tallo a bulan) ngem di met masursurot gapu kadagiti naibaga a rason iti ngato.
Iti kasoyo, no kayatyo a mabiit a malpas, ibagayo iti abogadoyo nga idawatna iti korte a mayiskediul koma iti agsasaruno a petsa nga agaassideg agingga iti malpas; ngamin, babbaket/lallakaykayon. Kinapudnona, mayun-una koma dagiti Senior Citizen, segun iti Akta Republika 9994. Kuna daytoy a linteg a dagiti Senior Citizen, adda preperensiada iti adu a banag, wenno isuda koma ti mayun-una.—O