Panagpili iti Gatangen a Pagpakan iti Aso
Nakaadadun dagiti mailaklako a ‘dog food’— ket maulawkan nga agpili!
RUAM dagiti agtartaraken iti natibo nga aso ti mangpakan lattan kadagiti tarakenda iti ania man a tedtedda a taraon iti kosina wenno dagiti pay ketdin dandanin mabangles a taraon.
Iti agdama, maisaganan wenno magatang payen ti sigud a naisagana a taraon a maipakan kadagiti taraken nga aso, natibo man wenno haybrid.
Ngem iti kaadu dagiti klase dagiti mailaklako a taraon ti aso iti merkado, makaulaw pay ketdin no ania ti gatangen ta yan-anunsio met ti tunggal agar-aramid a ti produktoda ti kasasayaatan.
Maysa kadagiti epektibo a tarabay iti panagpili iti ipakan kadagiti taraken nga aso ti edadda.
Adu ngamin nga agar-aramid iti pagpakan iti aso ti mangisagsaagna iti pormula ti pagpakan a naibasar iti edad ti taraken.
Mabingay iti tallo a klase dagiti pagpakan: para iti uken, nataengan ken senior.
Nagduduma ngamin ti kasapulan ti tunggal edad ti taraken nga aso a taraon a kas iti kaadu ti protina ken fat.
Saan ngarud a maibalbalakad a pakanen ti nataengan nga aso iti taraon a para iti uken malaksid no masikog wenno agpaspasusoda.
Ad-adu ti fat nga imet ti taraon a para kadagiti uken a nanayonan pay kadagiti sustansia a kasapulan iti dumakdakkel nga uken.
No maipakan iti nataengan nga aso ti taraon nga adddan iti nangato a fat, agtungpal daytoy iti nalabes a kinadagsenda.
Kadawyan pay a maipatpatigmaan ti panangipaay iti taraken nga aso iti kasasayaatan a pormula ngem uray no kasta, masapul met a panunoten ti kangato ti presiona.
Nangato ti presio dagiti nangato ti kalidadna a pagpakan ngem saan met a maibalbalakad ti nalaka ti presiona a pagpakan ta mabalin a maapektaran ti salun-at ti taraken nga aso.
Ad-adunto met laeng ti mabusbos no ipan ti taraken iti beterinario no dagiti kababaan iti presio a pagpakan ti ipaay iti taraken.
Adda pay dagiti pagpakan a kayat nga idasar kadagiti taraken ngem awan met iti asideg a tiendaan a panggatangan ket mapilitan a mapan iti adayo tapno laeng adda ipakan kadagiti taraken.
Rumbeng ngarud a dagiti laeng nalaka a gun-oden ti ipakan ta dinto ketdi agparparikut no kasta a maibusan.
Nasken pay nga amirisen ti etiketa a naipigket iti gatangen a pagpakan iti aso. Kadawyan a dagiti lima nga umuna a mailista iti taraon ti aso ti kaaduan a paset ket daytoy ti rumbeng nga amirisen.
No mais, trigo wenno soy-based dagiti mayuna a mailanad iti etiketa, padasen ti mangpili iti sabali ta saan a makaipaay ti kasasayaatan a nutrision iti taraken nga aso dagiti nagduduma klase ngem isu met laeng a carbohydrates.—O