Awisendakayo iti “Panagbenga 2016”!
Dinidigra ti napigsa a ginggined ti Siudad ti Baguio idi 1990. Ket iti ibabangon ti siudad, “nagukrad dagiti adu a sabsabong.”
RAMBAKAN manen ti Siudad ti Saleng (Baguio City) ti tinawen a “Panagbenga” nga iti pagsasao a Kankana-ey, kayatna a sawen, “panagukrad dagiti sabsabong.” Narugian ti Panagbenga idi 1995 a kas simbolo ti ibabangon ti Siudad ti Baguio kalpasan ti pannakadalupona gapu iti napigsa a ginggined a napasamak lima a tawen sakbayna.
Naluktan ti maika-21 nga edision ti Panagbenga idi Pebrero 1 nga addaan iti tema a “Blessed the Children with Flowers.” Ngarud, nairubuat babaen ti parada ken salip iti drum and lyre dagiti agad-adal iti elementaria iti siudad (kitaen dagiti ladawan).
Kadagiti nasapa a simmang-at iti siudad, nakitada la ketdi nga adun dagiti mabuya iti Lake Drive, Burnham Park. Adda ditoy ti “Baguio Blooms Exhibition and Exposition” a naluktan idi Pebrero 1 ken agleppas inton Marso 6. Adu dagiti agkakapintas ken nadumaduma a sabong a makita ditoy.
Ngem kas kadagiti napalabas a Panagbenga, kangrunaan a padpadaanan dagiti agbuya dagiti agkakapintas a “float” dagiti sabsabong a makitadanto iti Grand Float Parade a nayiskediul a maangay inton bigat ti Pebrero 28 (Domingo) iti Athletic Bowl. Sakbayna, iti Pebrero 27 (Sabado), maangay ti Grand Street Dancing Parade.
Manipud met iti Pebrero 29 agingga iti Marso 6, adda daytoy makunkuna a “Session Road in Bloom.” Maserraanto ti Session Road kadagiti motorista ta agbalin daytoy a nalawa a pagidispleyan kadagiti nadumaduma a produkto dagiti probinsia ti Cordillera Administrative Region (CAR) ken dagiti bisita a mayat a makipartisipar. Adunto dagiti nalaka a lako. Iti met Athletic Bowl (Pebrero 27-28), maangay ti Sponsors and Exhibitors Day.
Ti Panagbenga ti mabigbig a kagarbuan a parambak iti Amianan a Luzon. Kadagiti saan pay a nakabuya iti daytoy a parambak, awisendakayo a sumang-at iti Baguio bayat ti panawen ti Panagbenga. Agbalinto la ketdi daytoy a namaris a padas kadakayo.—O