Ditay Ammon ti Agtagibalay?
NO paliiwen ti agdama a kasasaad ti adu nga inna, saanda unayen nga ipateg ti panagtagibalay. Manangdanda lattan iti agdalus wenno agluto iti taraon a para iti pamiliada wenno gumatangda pay ketdi lattan iti sigud a naluto a taraon.
Agpayso met ketdi nga adu unayen ti pakakumikoman ket makunkuna nga awanen ti panawenda a para kadagiti aramid iti pagtaengan ngem uray no kasta, masapul nga ammuen dagiti inna a kangrunaan nga akemda ti mangisagana iti nasustansia a taraon a para kadagiti kameng ti pamiliada ken iti pannakadalus ken pannakaurnos ti pagtaenganda.
Adu payen a babbai ti dida kayat wenno saan a makaammo nga agluto. Saandan a maamiris a ti kasasayaatan a panangtaginayon iti nasalun-at a bagi ket ti panangidasarda met laeng kadagiti bukodda a luto a saan ket a dagiti luto a magatang iti ruar a di ammo no kasano ti pannakaisaganada.
Gapu ngata ta adu ti mabusbos a tiempo iti panangipaay iti nasustansia a taraon ti rason nga adun nga inna ti saan a mangayat nga aglutoluto. No ngamin kayat ti presko a taraon, kanayon ti ipapan iti tiendaan.
Adu pay a panawen ti mabusbos iti panangisagana kadagiti kayat a sidaen a nateng ken uray iti ikan a lutuen.
Ti koma nasalun-at a kameng ti pamilia ti prioridad ti tunggal ina a saan ketdi a mangbusbos iti adu a panawen iti selpon, telebision, kompiuter, Facebook wenno dadduma pay nga aramid.
Maysa pay kadagiti kangrunaan nga akem ti maysa nga ina ti panangmantenerna iti nadalus ken naurnos a pagtaengan. Masapul pay a sanayenna dagiti ubbing a tumulong nga agtagibalay no la ketdi ammodan ti magna ken kabaelanda ti sumagmamano nga aramid.
Iti sabali a pannao, masapul a nagaget ti maysa nga ina a mangtaripato iti salun-at ti pamiliana ken iti pagtaengan.
Saan koma a dagiti wara ti mangituray iti maysa nga ina. Ti ina nga agtagtagibalay ti rumbeng a mangituray kadagiti wara.
Saan nga idulin dagiti saanen a kasapulan a bambanag. Ipaay ketdi kadagiti makasapul.
Isu nga uray kasano ti kaadu wenno kabassit ti kuarta, wenno kasano ti kadakkel wenno kabassit ti pagtaengan pagtalinaeden daytoy a naurnos ken nadalus.
Itandudo ti naurnos ken nadalus a pagtaengan ti ragsak ti sibubukel a pamilia.
Saan koma nga urayen ti maysa nga ina a ti asawana ti mangaramid kadagiti rumbeng nga aramidenna iti uneg ti pagtaengan.—O