Kastoy, Kapid, Ditoy Hawaii
Panagserbi ti Kangrunaan
INSURATKO itay napalabas a lawas a nanumo ti kasasaad dagiti opisial ditoy, Kapid. No bileg ti pagsasaritaan, awan kadakuada ti karbengan a mangirekomendar nga agtrabaho ti uray dianitor laeng. Saanda met a mabiangan ti pannakakontrata ti pannakatarimaan dagiti kalsada wenno pasdek. Iti ababa a pannao, awan panguartaanda malaksid iti sueldoda.
Ngem no sueldo ti pagrukodan, kapid, agarup agpada laeng ti sueldo ti diputado ken ti maysa a superbisor nga inheniero. Ti la pagsayaatanna, aganay nga innem laeng a bulan ti panagopisinada wenno panag-session-da. Ket bayat ti kaawan sesion dagiti diputado wenno senador, agtrabahoda iti bukodda a pamastrekan a panganay iti kasapulan ti pamiliada a kas koma iti panangabogado, panangagas, kas konsultant, panagtalon wenno kas drayber ti taksi, kdp.
Itay napalabas a tawen, kinuna ni Sen. Jill Tokuda, chairwoman ti nabileg a Ways and Means Committee, a nagpaay a konsultant ti Daniel K. Inouye Institute, iti reportna iti Ethics Commission a nasuelduan isuna iti $25,000.00 iti Daniel K. Inouye Institute.
Agtagikua met ni Dip. Sam Kong iti sumagmamano a taksi. Isu ti mangisaup nga agmaneho no adda drayber a saan a sumrek. “Bassit ti sueldok nga agmaneho ngem adu ti maalak nga impormasion manipud kadagiti pasahero,” kinunana. Kaaduan kadagiti pasahero ti saan a makalasin kenkuana.
Iti biang da House Speaker Joe Souki ken Senate President Ron Kouchi, adda inreportda a nateggedanda iti saan a nainaganan a panggedan iti $7,500.00.
Iti sabali a bangir, iti kaadda ni Sen. Josh Green iti distritona idiay Big Island no awan sesion, nakasapul iti $260,000 a kas mangagas. Maysa a doktor iti medisina ni Sen. Green, ken addaan iti bukod a klinika ngem kinalikagumanna ti agserbi kadagiti umili.
Panagtalon ti maysa a pakakumikoman ni Sen. Clarence Nishihara ngem inkatawana laeng idi maagapad ti pakadagupan ti nateggedanna. Nagretiro kas Prinsipal iti elementaria sakbay a simrek iti politika.
Manmano kadagiti diputado ken senador ditoy ti narang-ay ti panagbiagda sakbay ken kalpasan ti panagtakemda, kapid. Saan a nasken nga adu ti kuartana ti sumrek iti politika. Ken bassit ti maipalubos a gastuen ti maysa a kandidato. Nainget ti Campaign Spending Commission a mangarisit iti nabusbos ti maysa a kandidato bayat ti panagkampaniana. Pannakaibalud ken multa ti maipaay a dusa ti asino man a matakuatan nga aglabsing.
Agsipud ta donasion manipud kadagiti umili ti kaaduan a paggapuan ti gastuen ti maysa a kandidato, saanna a maaramat ti kuarta wenno pondo ti kadidaturana iti bukodna a pagnam-ayan. Kas pagarigan, ti pondo a naigatang iti lugan, saan a mabalin nga aramaten dayta a lugan kadagiti bambanag nga awan pannakainaigna iti kandidaturana— uray iti simbaan wenno balay ti pammati.
Adda met kaballabag ti pork barrel, ditoy, kapid. Adda credit card a maited kadagiti opisial a mabalinda nga aramaten kadagiti bambanag nga adda pannakainaigna iti panagserbida iti komunidad. Ngem kas naagapaden, nainget ti pannakaarisit dagitoy a paggastuan.
Itay napalabas a tawen, napilitan ti maysa a konsehal a nangisubli iti nangaramatanna iti credit card. Natakuatan ngamin a saan nga opisial a sangaili ti siudad ti kadua ti konsehal a nangan idi inaramatna ti credit card. Maysa pay a konsehal ti namulta iti $8,100 gapu ta dina impakaammo iti Ethics Committee idi inlibre ti maysa a lobbyist (addaan iti kidkiddawen a gakat iti konseho) iti maysa a pangaldaw ken panagay-ayam iti golf.
Ngem saan a nainget ti komision ti eleksion. Mabalin dagiti empleado ti gobierno ti agkampania para iti kayatda a kandidato no la ketdi maaramid daytoy no saan nga iti opisial nga oras ti panagtrabahoda. Kinapudnona, tunggal eleksion, adda itantandudo/ yendorso a kandidato ti Hawaii Government Employees Association ken kasta met ti Hawaii State Teacher’s Association.
Ditoy Hawaii, kapid, ken iti amin a paset ti America, panagserbi ti kangrunaan a makaigapu a paidasig a kandidato ti maysa a tao, saan a gapu iti bileg ken saan a panagpabaknang.—O