Padasem Daytoy, Kailian
Nalaka nga urayen ti sunflower. Manipud pannakaitukit ti bukel, agsabongen daytoy kalpasan ti 45 nga aldaw.
KADAGITI dadduma a pagilian, gagangay a maimulmulmula ti sunflower kadagiti inek-ektaria a daga. Maaramat ngamin dagiti bukel daytoy a taraon dagiti tattao ken pagpakan kadagiti tumatayab. Adda pay maala kadagiti bukelna a manteka a pagluto.
Ngem ditoy pagiliantayo, awan pay ti plantasion ti sunflower tapno adda pangalaan kadagiti bukel daytoy a kas taraon ken pagpakan ken tapno maaramid a manteka. Nupay kasta, dandani metten agbalin nga uso ti panagmula iti sunflower kadagiti arubayan ken kadagiti nursery gapu iti tallo a rason.
Umuna, napintas daytoy a pangpapintas iti aglawlaw saan laeng a kadagiti arubayan no di pay ketdi kadagiti resort ken pagay-ayaman iti golf.
Maikadua, maimula kadagiti masetera. Umad-adu ngamin dagiti mayat nga aggatang kadagiti naimasetera a sundflower.
Maikatlo, kas pagalaan iti cutflower a para kadagiti flower arrangement.
Gapu met kadagitoy a rason, napintas ita a panguartaan ti panagmula iti sunflower. Gapu met iti daytoy, adda ita maysa a kompania nga aglaklako kadagiti bin-i wenno bukel ti sunflower a maimula, abono ken dadduma pay a kasapulan iti panagmula iti sunflower. Isu daytoy ti Allied Botanical Corporation a mangangangay pay kadagiti seminar maipanggep iti panagmula iti sunflower.
Adda uppat a barayti ti sunflower a kaay-ayo ita dagiti agmulmula iti nasao a masetas. Adda daytay pandaka nga agtayag laeng iti 6-8 a pulgada ngem dadakkel ti sabongna. Isu daytoy ‘tay Sunbright Kids. Maibagay a maimula daytoy kadagiti masetera.
Apagpagisu laeng met ti katayag dagiti tallo pay a barayti— agingga iti mapan a maysa a metro laeng.
Ti maysa kadagitoy ket ti Vincent’s Pomelo nga amarilio dagiti sampaga wenno petalo daytoy ken adda berde iti tengnga ti sabong.
Sabali met ti Vincent’s Choice nga addaan iti nangisit iti tengnga dagiti sabong daytoy.
Ti maikatlo, isu ti Vincent’s Fresh nga adda met berdena iti tengnga ti sabong.
Dagitoy a tallo ti maibagay a para iti landscape, maimula kadagiti container, ken pagalaan iti cutflower.
Kas kuna ni Rowena Bienes ti Allied Botanical, napintas a para cutflower ti sunflower ta mabayag sakbay a malaylay. Agpaut uray agingga iti makalawas ta saan a pataud ti polinasion babaen dagiti insekto a kas kadagiti ambubuyog (alimbubuyog), kulibangbang wenno uyokan.
Mabiit met nga urayen ti panagsabong ti sunflower. Manipud maitukit ti bukel, manamnama ti panagsabongna kalpasan ti 45 nga aldaw.
Panagmula
Ibalbalakad ni Ms. Bienes ti panangitukit kadagiti bin-i iti seedling tray ken panagaramat iti Klassman growing medium (isu daytoy ti pannakadagana). Iti uneg ti makalawas, mabalinen nga imula ti bunubon iti masetera. Agusar iti napaglaok a garden soil ken Klassman a pagmulaan.
Tapno nalapsat dagiti mula, mangtunaw iti Peters fertilizer (30-10-10) ket daytoy ti yabono. Nangato ti imetna a nitroheno daytoy. Kalpasanna, abonuan iti Peters 9-45-15 tapno napintas ti panagsabongda. Uray linawas kano a mapasuyotan dagitoy iti abono. Masapul nga iti met main-initan ti pangipuestuan
Padasenyo man met ti agmula iti para lako a sunflower!—O