Ti Gasatmo Ita a Lawas
PISCES (Pebrero 19- Marso 20). Dakkel ti maaramidam iti taray ti biag ti sabali ngem ammom koma ti pagpatinggaam. Pagtalinaedem koma ti kinalamiis ti ulom iti ania man a paguummongan ta mabalin a sika ti mangdepdep iti uram a mabalin a maparnuay. Nagasat a numero: 1, 4, 8.
ARIES (Marso 21- Abril 19). Agannad iti arbis nangruna iti malem ta mabalin a daytoy ti mangparnuay iti bassit a sagubanit nga agpakillo no di masigudan. Mabalin a makapasangpetka ita iti nayon ti karkaratikitem iti bolsam. Nagasat a numero: 2, 5, 7.
TAURUS (Abril 20- Mayo 20). Iturong koma ti amin nga aramidmo ita kadagiti pakaay-aywan dagiti kameng ti pamilia. Bagim ita ti mangpalukay iti linas ti kinamannakaawatmo. Diplomasia ti igam a panggaw-atmo iti balligi. Nagasat a numero: 3, 4, 9.
GEMINI (Mayo 21- Hunio 21). Paaduen ti sumrek ken timbengen ti rummuar a kuarta ta ditoy ti pakarukodan ti kantidad ti parabur a sumrek kenka. Maysa a ganggannaet ti makasinged ken mamagbaliw iti taray ti panagbiagmo. No agduadua iti agdama nga ar-aramiden, isardeng ken mangabaruanan. Nagasat a numero: 1, 6, 8.
CANCER (Hunio 22- Hulio 21). Mabalin a saanen a nasken a payapayam ti grasia ta ammo daytoyen ti dalan nga umay kenka— isagana ketdi ti bagi nga agrambak. Umadayo ketdi iti nariribuk nga aglawlaw no kaguram ti masukit ken tapno di masukal ti agdidiaya a suerte. Panawen a panangtaliaw, saan laeng a ti nakautangan iti naimbag a nakem no di pay ket ti makasapul iti tulongmo. Nagasat a numero: 2, 4, 7.
LEO (Hulio 22- Agosto 21). Maliklikan ti idadakkel ti bassit a riri no pagarien ti kinapositibom iti amin a banag. Adda bassit pagbalbaliwan ti plano para iti pagkuartaan. Ti kinamanagpartuatmo ti mangurnos iti ania man a parikut a dumteng. Ipaay iti kaubingan a kameng ti pamilia ti maikari kenkuana a panangigigir ken pannaripato nangruna itoy a lawas a kasapulanna unay. Nagasat a numero: 3, 6, 8.
VIRGO (Agosto 22- Septiembre 22). Nalaka laeng a matiktikawka iti pisikal a langa— ikkan ti bagi iti naan-anay a gundaway tapno makapagamiris. Iti kanito a natalekkan iti pinansial nga aspeto ti pagtaengan, isaruno met nga urnosen ti langen-langen iti uneg ken ruar ti pamilia. Makipagrikna, saan a mamagbaga, ti kasapulan ita ti maysa a kasinged. Nagasat a numero: 2, 4, 7.
LIBRA (Septiembre 23- Oktubre 23). Panagtitinnulong ti mangrisut iti komplikado a banag. Iti agtengnga ti lawas, dumteng ti maysa a sorpresa. Agannad kadagiti manggunggundaway iti kinamanagparaburmo. Mabalin a maldaanganka no maimatangam ti kinaadu ti parikut iti aglawlawmo ngem dayta a pannakaamiris ti pagragsakam— addaka a pangrugian ti positibo a banag. Nagasat a numero: 1, 6, 9.
SCORPIO (Oktubre 24- Nobiembre 21). Napintas a kapanunotan ti maysa a kasinged ti mangsolbar iti parikut a mangburburibor kenka isu a maibalakad a rummuarka iti balayyo. Dagiti bunga dagiti immula iti kallabes, matnagto iti saklmo inton dumteng ti panawenda— nupay medio mabayag pay. Nagasat a numero: 3, 4, 8.
SAGITTARIUS (Nobiembre 22- Disiembre 21). Maysa a gayyem ti tumulong tapno mawadaan ti dalanmo. Adda met dagiti puonan nga ipagarupmo nga agkurang gapu iti sobra a kinalayog ti punpuntiriaem. Adda laeng iti asidegmo ti kangrunaan a mangpamaris iti aglawlawmo. Nagasat a numero: 2, 5, 9.
CAPRICORN (Disiembre 22- Enero 19). Malawlawagan ti panunot a nakullaapan gapu iti maysa a narikut a pagpilian no makapagaliwaksay iti medio adayo. Kadagiti saan pay a naasawaan, mabalud pay ti rikna a mabalin nga agtungpal iti kallaysa. Nagasat a numero: 3, 4, 8.
AQUARIUS (Enero 20- Pebrero 18). An-anusan ti kinangednged ti parabur iti apagtapog ti lawas ta sumangbay daytoy iti arinunos. Makaileppas pay iti tulag maipapan iti pagimbagan iti agtengnga ti lawas. Mabugaw ti mamalas no agaruat iti namaris. Nagasat a numero: 1, 5, 7.