Tao, Lugar, Pasamak
IDI rabii ti Pebrero 2, 2016, iti President Elpidio Quirino Stadium iti Bantay, Ilocos Sur, naiget ti risiris iti kinapintas ken kinarimat dagiti Saniata a nangibagi kadagiti 31 nga ili ken 2 a siudad ti Ilocos Sur iti naangay a Search for Miss Saniata Ilocos Sur 2016, maysa kadagiti tampok ti 10-aldaw a selebrasion ti “Kannawidan Ylocos Festival 2016” (Enero 29-Peb. 7).
Idi nagarinadnad ti salip, napili ni Nicka Abegail Corpuz, Miss Saniata ti Bantay, a Miss Saniata Ilocos Sur 2016.
Ti kalleppas a selebrasion ti maika-9 iti tinawen a “Kannawidan Ylocos Festival” a nairubuat idi 2007. Tinarawidwidan daytoy ti Provincial Tourism of Ilocos Sur nga idauluan ni Ryan Astom, Provincial Tourism Officer, iti panangpondo ti gobierno ti Ilocos Sur.
Malaksid kadagiti agkakapateg a sagut manipud kadagiti nadumaduma nga esponsor, immawat pay ti baro a Saniata ti Ilocos Sur iti P100,000.00 manipud iti gobierno ti probinsia. Ibagiannanto pay ti probinsia kadagiti nangatngato a level ti salip iti kinapintas.
Kas kinuna ni Gob. Ryan Luis Singson, paset ti agtultuloy a pannakaipromot ti turismo iti Ilocos Sur ti tinawen a Search for Miss Saniata Ilocos Sur. Dagiti met Saniata ti tunggal ili ken siudad, agserbida met iti bukodda a lugar a kas iti panagserbi ti Miss Saniata Ilocos Sur.
Dagiti nagserbi a hurado iti pageant: Yvethe Marie Santiago-Bb. Pilipinas Supernational 2014, Carla Jenina Lizardo- Mutya ng Pilipinas International 2010, Mary Anne Bianca Guidotti- Binibining Pilipinas International 2014, Marita Cassandra Kim Naidas- Ist Runner Up 2015 Ms. World Philippines; Modesto Baloloy- Chief Operations Officer ti Department of Tourism, Region 1; Marco Alcaraz- actor, model ken dati a varsity player ti San Sebastian College-Recoletos; ken Jojo Bragais- international shoe designer. (