Okeyka, Apong
DAGITI sangapulo ket dua a palagip iti panaggarden:
• Regular ti panagsibug ngem saan a kadagiti kapudotna nga oras. Kasayaatan no sibugan dagiti mula iti nasapa a bigat. Liklikan met ti sobra a panagsibug.
• Saan nga idirekta ti hose kadagiti mula, wenno iti puon dagitoy. Ipusitsit a kasla nalailo a tudo. Agusar iti tabo wenno dipper kadagiti nakamasetera a mula. No sobra ti panagsibug, mayanud dagiti sustansia ti daga.
• Pagbubunggoyen dagiti mula a kasla mangbukelda iti natural a komunidad, pagtalinaeden ti umno a distansia dagitoy segun iti kita ti panagbaludbod para iti patas a pannakaala iti lawag ti init ken espasio.
• Mabalin a delikado ti agibitin iti masetera ta amangan no matupakan ti ulo ti lumabas. Ngem no kapilitan, siguraduen a natalged ti pannakaibitinna.
• Sukatan ti daga dagiti masetera tapno mamantener ti umno a sustansia ti daga. Agsugot wenno agmula manen no nasken. Agusar iti compost tapno saan nga agbalin a napigket ti daga.
• Pagbubunggoyen dagiti mula nga agkasapulan iti agpada a kadarato ti pannakasibugda para iti agpapada a panaglangto ken panagbaludbod, ken tapno makainut iti danum.
• Pagbubunggoyen dagiti nakamasetera a mula nangruna iti kalgaw tapno nalaklaka ti agsibug, ken tapno masalakniban dagitoy iti sobra a pudot ken pannakaadas (dehydration).
• Malaksid no nasken, dikay’ agus-usar iti masetera, agmula a direkta iti daga. Narigrigat ti mangmantener wenno agaywan iti nakamasetera a mula.
• Regular a pukisan dagiti muyong (shrubs) ken kaykayo para iti kinatalged ken tapno makaay-ayo iti mata. Mabalin pay a pagpasabong ken pagpabunga ti panag-trim. Makatulong pay iti pannakakontrol dagiti peste.
• Mapaksiat dagiti peste babaen ti panamagtalinaed iti kinadalus ti aglawlaw. Makapaksiat iti peste dagiti mula a kas iti oregano, pandan mabango, bawang, ken lasona.
• Sursuruen ti basic horticulture. Agbasa, agsukisok, ageksperimento, agpraktis.
• Pagbalinen ti gardenmo a kas natural a sanktuario wenno taeng dagiti tumatayab, kulibangbang, kulalanti, ken uray tukak wenno kapamiliada. Pagbalinen a sibibiag a laboratorio ken disso a paginanaan.—O