Biag ni Ilokano
Adu dagiti peggad nga ipaay ti panagaramat iti artipisial a siampo isu nga adu ita dagiti agsubsubli iti pannakaaramat dagiti nakaisigudan a wagas ti panagdalus iti buok.
LIMAPULO a tawenen ti napalabas, nalatak pay laeng ti panagaramat iti gulgol a pangdalus iti buok dagiti babbai. Maaramid ti gulgol manipud iti napuoran nga arutang wenno sabsabali pay a bulbulong wenno ukis dagiti napili kayo a mayuper iti danum.
No napuoran nga arutang ti maaramat, mabalin pay a maikabil iti sarangusong (‘tay akinngato a paset ti sabut ti niog) sa maibatog iti ulo. Masibugan iti danum ti napuoran nga arutang, agtedted daytoy iti ulo ket imasahe ti tedted iti buok.
Magulgolan ti buok tapno maikkat dagiti naurnong a rugit a saan a maikkat iti kadawyan a sabon. Kadagiti nagkakauna nga aldaw, agaramat dagiti babbai iti lana ti niog a pangpangisit ken pangpasalun-at iti buokda ket gapu iti daytoy maurnong ti tapok no agbayag iti kudil ti ulo.
Agar-aramat met dagiti lallaki iti pomada a napigket ket agurnong met iti rugit a saan a daras a maikkat no saan a magulgolan. No dadduma, agaramat dagiti lallaki iti sabon a paglaba a pangikkat iti lanit ti buok ken iti kuldi ti ulo.
Siampo ken Conditioner
Iti panaglupos ti panawen, in-inut a napukaw ti panaggulgol wenno ti nariingan a wagas iti panangdalus iti buok. Naisukat ti panagaramat iti siampo a kadawyan a napalet a likido. Maisapsapo daytoy iti nabasa a buok sa maimasahe sakbay a mabalnawan.
No dadduma, maisaruno ti pannakaaramat ti hair conditioner tapno ad-adda a nasantak ti langa ti buok.
Adda pay dagiti siampo a nairanta a makaikkat iti lasi, kuto ken para kadagiti maladaga ken ubbing a saan a naapges no maikkan dagiti matada.
Adda pay ketdin dagiti siampo a para kadagiti taraken nga ayup a kas iti kabalio, aso, pusa ken dadduma pay a taraken. Kadawyan nga imet dagitoy a siampo a para kadagiti ayup ti insektisidio a pangpaksiat kadagiti parasitko a kas iti timel wenno adda imetda nga agas a pangagas kadagiti sakit ti kudil.
Adu ketdi ti mairepreport a saan a nasayaat nga epekto dagiti komersial a siampo, kangrunaanna ti alerdyi.
Adu pay ketdi ti mairepreport nga apektaran dagiti dadduma a kemikal nga imet ti siampo ti kabaelan dagiti baro ken dumurdur-as a neurons. Maysa a klase ti selula ti neuron iti sistema ti nerbios a mangyallatiw kadagiti marikrikna tapno dumanon iti utek.
Dadaelen ti kanayon a panagaramat iti siampo, saan laeng a ti buok ngem ti sibubukel a bagi. Gapu ta sintetiko ken napeggad dagiti kemikal a sagepsepen ti bagi, dadelenda ti sistema ti bagi nga agtungpal iti adu a sakit a pakairamanan ti kanser.
Panagsubli iti Nakaisigudan
Iti adu a pammaneknek ti siensia kadagiti peggad nga ipaay ti panagaramat iti artipisial a siampo, adu ngarud ita ti agsubsubli iti pannakaaramat dagiti nakaisigudan a wagas ti panaggulgol wenno panagdalus iti buok.
Adu ngamin dagiti positibo a pagsayaatan ti panagaramat kadagiti natural a siampo iti buok ken iti kudil ti ulo ken iti panagaramat pay iti lana ti niog ken aloe vera a pangpasantak iti buok. Tumulong dagitoy ti pannakapabaro dagiti napukaw a buok babaen ti panangpasalun-atna kadagiti hair follicles. Ipaayanna iti natural a lanit ken minerals tapno mamantener ti dam-eg ken pasayaatenna ti nasaknap a kasasaad ti buok ken kudil ti ulo. Agsipud ta natural, saan a makaparnuay iti alerdyi ket mayannatup iti ania man a klase ti buok ken kudil.
Saan pay a makadangran ti gulgol iti aglawlaw a saan a kas kadagiti naingel a kemikal a pakairaman pay ti pannakaibelleng ti nakaipaketeanna.
Maysa laeng kadagiti parikut iti panagaramat kadagiti natural a siampo ti kaawanen dagiti maaramat a kas iti arutang.
Sigud a maala ti arutang manipud iti nagirikan kadagiti pagay a naani babaen ti rakem. No kayat nga alaen ti arutang, mabalin nga isina wenno gupden ti arutang manipud iti garami.
Manmano metten dagiti dadduma a muyong, kas koma iti gugo a pakaalaan iti gulgol.—O