Iti Yaagibas ti Salemsem
Ammok a sika Ti gapuna no apay a kalpasan Ti pannakaibulos ti amin nga alimbasag Ti amin a ngatangata A sinuplian ti pannakapnek Iti baet ti bitekbitek ken daripespes Nga inasawaan ti diak masungka a rikna Kas iti isasangbay ti init Kalpasan ti narungsot nga allawig Ti irarangrang dagiti bituen No kidem ti law-ang Wenno ti dangep ti linnaaw Kalpasan ti salimuot ti sardam A mangtakaw iti kararuak A mangbalkot kenka Nga agpatnag Iti yaagibas ti salemsem Bayat ti panangtagikuak iti lagipko Iti lagipmo a tartaraonan, a bibiagen Ti apaganem-em a lammin. Ti aglaplapunosan nga iliw.
--ARNOLD C. BAXA Binannikesanna. Agburburek ti darana.
“Hoy! Sika a lalaki! Animal abuse dayta inaramidmo i‘ta pusak, a! Ipulongka ken ni Apo Kapitan, kita’m!” Uray la agsabat dagiti immarko a kidayna iti nalaus a pungtotna. Umas-asuk sa pay dagiti lapayagna iti panagbarana. “Tadtadem, kunam ‘ta pusak? Di pay la sika ti tadtadek ta sikan a ti adobuek!” impigsana ti bosesna ket uray la a nagparang dagiti urat iti karabukob ken pispisna iti panagpatangkenna gapu iti nalaus a pungtot.
Apagsaona timmalikuden. Dinan inuray a makapagsao ti lalaki a naikuleng sa pay. Binagkatna ni Amour a nakatakder iti ruangan. Simrek sa impalibbaagna ti landok a rikep. Nariknana pay ti panakagunggon ti rikep ti ruangan.
Iti rabii, simrek ni nanangna iti kuartona. Paul-ulogen daytoy ta adda kano sangailina a baro nga agnagan iti Roman ken agyan iti balay da antina a Rita.
Dina kayat a sanguen ni Roman. Nasakit ti nakemna iti inaramid daytoy ken ni Amour. Sabagay, dina ilibak ti panagraemna iti kinaguapo ti lalaki. Dumaranudor ngarud ti barukongna bayat ti panangsungatna ngem naunaan met ti nalaus a pungtot. Ngem nupay agburburek ti darana bayat ti panagsangoda, dina naaluadan a pinadalanan ti lalaki manipud ulo agingga’t dapan. Agarup lima a kadapan ken pito a pulgada ngata ti tayagna. Nataytayag ngem isuna iti tallo a pulgada. Napudaw. Burgis. Naisem a panagmatmata a kasungani ti simmingkit a matana a pinagbukiradna itay gapu iti nalaus a pungtotna.
Di napilit ni nanangna a rimmuar. Impambarna a dina amammo dayta a Roman. “Ag-dysmennorhea-ak, ‘nang,” kinunana. Awan naaramidan ni nanangna no di isuda ken tatangna ti nangsango ken ni Roman. Adda ketdi iti asideg ti ridaw. Dina napengdan ti bagina a nangal-allingag iti saritaanda. Nabangag ti boses ni Roman ngem nagsam-it iti panagdengngegna.
“Umayak koma agpadispensar iti balasangyo, sir, ma’am, gapu ti panangbugtakko iti pusana,” nangngegna a kinuna ni Roman. “Nabautko ta diak naterred ti riknak. Kasano ket umay met ngamin agtakki dita yanmi. Agisbo pay. Numona ta asthmatic-kami… Ngem agbabawiak. Naamirisko a madi gayam ‘diay naaramidko. Kaasi met ‘diay pusa. Nakapungtotak la ngamin a talaga. Diak pay namnamaen a pusayo gayam daydiay…”
Naalumamay ken kasla agpakpakaasi ti boses ni Roman. Kasla adda met mangidurduron kenkuana a rummuar ngem pinengdanna ti riknana. Nangngegna laengen ti kinuna ni nanangna: “Pasensiaamon ‘diay balasangmi, barok. Kasdiayna a talaga. Napalalo ti panangdungdungngona i’ta pusana. Kasla ubing ti pampamay-anna. Pinanagananna pay iti Amour.”
“Ala, barok, dakamin ken nanam ti makaammon. Maawatannaka met siguro,” kinuna met ni tatangna.
III. MOUR, ‘yanmo manen, aya?” makapungtoten nga agsapsapul iti pusana ta awan manen iti balayda. Sinaludsodna ken ni nanangna no nakitana ngem saan kano met. Nabannogen nga agsapsapul.
Kapilitan a napan iti balay da antina a Rita. Isu ti namnamaenna a ‘yan ti pusa. Masansan ngamin a makitkitana a tumtumpuak iti ipagarupna a kuarto ti balay. Dina ammo no ania ti kukueenna idiay.
Tinilmonna amin a bainna, inturturedna ti nagtoktok iti narra a bulong ti ridaw. Agkebbakebba aglalo idi madlawna a naiduron ti bulong ti ridaw. Nagbabawi iti inaramidna. Kasla kayatnan ti aglemmeng wenno agsubli iti balayda.
Bareng saan a dayta a Roman, kinunkunana iti isipna. Ngem
nabaked a lalaki ti inyula ti ridaw. Ni Roman. Dina naaluadan ti bagina a nangdayaw ti kinataer ni Roman. Nakasuot daytoy iti puraw a basketball jersey a nabatad ti asul a drowing ti nalatak a rangtay ti San Francisco ken numero 30. Maka-Golden State Warriors met gayam a padak! nakunana iti bagina. Nakasapin ti lalaki iti camouflage a pagat-tumeng ti kinagayadna. Nakatsinelas iti nangisit a nabatad ti tatakna nga AND 1. Adda pay nakasalapay a puraw a labakara iti kanawan nga abagana. Pagpumpunasna iti ling-et nga agar-arimasa iti muging ken rupana. Nakaiggem pay iti saplid. Nalabit, madama nga agdaldalus. Nagtaeren ken nagguapon!
“Oh! Good morning!” inkablaaw a dagus ni Roman kenkuana. Kimmamatis sa pay dagiti pingpingna. “Ala, sumrekka, a,” nagpaigid ni Roman. Insenias daytoy ti iseserrekna. Nagrukob ti baro idi sumrek. Panagriknana, kasla maysa a prinsesa a paspasangbayen ti prinsipe. Alusiisen idi malabsanna ti baro. Nalang-abna ti bangbanglo daytoy a no di agbiddut ket Nautica. Nagbanglon! nakunana manen iti bagina.
“Pagpasensiaam no nawara, a. Diak pay nakadalus ngamin. Amangan ngamin no kunaem a dugyotak,” inyisem a kinuna ni Roman. Nagparang dagiti singin a kallidna. Adda pay apagtubo a naingpis nga iming iti ngatuen dagiti naingpis a bibig daytoy. Dina ammo ngem nakarikna ti nagpaiduma a ragsak. Makilkilig pay a mangmingmingming iti baro a nakatakder iti abay ti ridaw bayat ti panagtugawna.
“Hm… Immayak gayam idi rabii idiay balayyo ngem sayang ta dita met nagsango. Nagsayaat ketdin ta nakaumayka ditoy ket makapagpadispensarak kenka iti personal gapu iti naaramidko ken ni Amour a pusam,” naalumamay a kinuna ni Roman kenkuana idi maisimpana ti nagtugaw iti narra a tugaw iti salas. “Diak inggagara daydiay. Very sensitive-ak la ngamin no maminsan. Lumakayak san isu a kastoyak.” Nagkatawa iti nakapsut.
Naisursurot met, di pay naisina dagiti matana iti baro. Binuybuyana ti panagplastar daytoy a nagtugaw iti sanguananna. Maysa a nagtimbukel a narra a lamisaan a naparabawan iti puraw a nagtimbukel a mabuong a flower vase ti nagbaetanda. Naglaon daytoy iti nadumaduma ti marisna a plastik a sabsabong ken puraw a babassit a bato. Kayatna ti agsao ngem awan latta ti maarikapna. Talaga a nagmagan ti karabukobna.
“Ay, wen, siak gayam ni Romano… Romano Ambrocio, Jr… Roman for short, kas ken ni Roman Reigns a nalatak a wrestler ken paboritok. Big No-No to JR but I’m proud to be my father’s junior. Thirty. Still single and ready to mingle. Angkelko ni Angkel Dean. Ading ni mama. Sika ngay?” Adda gayamen ni Roman a nakatakder a nangitanggaya iti dakulapna iti sanguananna.Ti asawa ni antina a Rita ti ibagbagana nga Angkel Dean. Nagsam-it man ti panagdengngegna iti nabangag a boses ti baro. Napaisem ta kanagnagan gayam daytoy ti paboritona a wrestler. Nairanrana laeng kadi? Apay nga agpadpadada kadagiti paborito?
“Ah, kua… Bella…” insungbatna bayat ti panangawat ti kanawan a dakulapna iti dakulap ni Roman. Nariknana ti bara ti dakulap ti baro.
“As in Brie wenno Nikki Bella iti The Bella Twins a wrestler? Wenno Bella Andre nga autor ti The Sullivans Series kas iti The Look of Love?” impilosopo ni Roman a nakapetpet iti dakulapna. Aglamlamiis sa pay dagiti dakulapna a nakialamano. Napaisem ketdi iti kinuna daytoy. Saan la gayam nga agbuybuya iti wrestling, managbasa pay iti libro a kas kenkuana. “Arabella Jill Calivoso,” inyisemna met nga insungbatna. “Whoah! Nice name! Jill! Kanagnaganmo ti maysa kadagiti paboritok a nobelista. Jill Mansell.”
Paboritok met, kunana koma met ngem awan ta awan latta ti