Nagpukaw a Kasla Asuk ni Lakayna

SALUDSOD:

Idi 2007, nagkasarkami ken lakayko. Kalpasan ti makatawen, impasngayko ti maysa nga ubing a lalaki. Idi 2009, nagpakada ni lakayko a mapan agtrabaho sadiay Manila ta adda gayyemna a nangibaga nga adda pagtrabahuanna sadiay kompania a pagob-obraanna. Idi damo agipawpaw-it met iti sustentomi ngem idi agangay awan metten. Napanko binirok iti lugar a pagtrabtrabahuanna, kas imbagbagana ngem kunada nga awanen sadiay a nabayag. Uray ‘diay gayyemna a nangallukoy kenkuana a mapan agtrabaho sadiay, awan met kanon. Adu ti nagdamdamagak no ammoda ti ayanna ngem awan ti makaibaga. Bayat ti kaawanna, adda baro a naam-ammok idi immay gimmatang ditoy bassit a kantinak nga isu ti pangal-alaak iti pagbiagmi iti anakko. Agkursonada unay ti lalaki kaniak ta adda pay met pamuyaak ta idi nagkallaysakami ken lakayko, agtawenak laeng iti duapulo. Ita, talaga nga agregget kaniak ket kayatnak nga ikallaysa uray ammona ti kasasaadko a pinanawan ti asawana ken adda anakko. Ita, kayatko koma, Apo Hues, ti mangala iti patigmaan kenka no mabalin a makikallaysaak manen gapu ta nagpukaw metten a kasla asuk ni lakayko.--Katrina ti Ilocos Norte

SUNGBAT:

Iti sasaadem, no mabalin koma ket waswasem nga umuna ti kasaryo ken nagpukaw a lakaymo sakbay a makikasarka manen. Ngem adu ti magastom no kastoy ti aramidem. Isu a ti kasayaatan, mangyulika laengen iti kaso a panangideklarar a ni asawam ket “natayen.” Mabibiit ken bassit ti magastom no kastoy ti aramidem.

No awan ti attorney wenno adda ngem nangina ti singirenna ket dimo kabaelan gapu iti rigat ti panagbiagmo, mangalaka iti abogado nga aggapu iti Public Attorney’s Office (PAO) iti lugaryo. Segun iti Family Code, mabalin nga ibaga a natayen (Declaration of Presumption of Death) ti maysa a tao no nagpukaw iti pito a tawen wenno awanen ti damag no sadinon a suli ti lubong ti ayanna. No “natayen” ti asawam, nawaswas metten ti kallaysayo ket mabalinmon ti makiaasawa manen nga awan basbasolmo. No ngamin makikallaysaka manen a di pay nawaswas ti immuna a pannakikallaysam, bigamia (bigamy) daytoy (Art. 349 ti Kodigo Penal) ket maibaludka agingga iti sangapulo ket dua a tawen sadiay Bilibid.—O