Nabaybay-an ti Agrikultura iti Filipinas, Kas Kuna ni Uliteg
NAGWARAS ditoy Hawaii, kapid, ti damag,nga adu dagiti kakailiantayo ti agawid manipud kadagiti pagilian dagiti Arabo. Bimmaba kano ngamin ti presio ti gasolina ken dadduma pay a produkto dagita a pagilian.
Gapu iti dayta, nagkissayda iti trabahador ta saan pay a masinunuo no kaanonto ti ingangato ti presio dagiti produktoda.
Napalalo ti bassawang ni uliteg ta immawag ni kasinsinmo a Damian ta nairaman kano ti anakna a naawanan iti trabaho. Dumawdawat ni Damian iti tulong ta awan namnamaenna a pangsaka iti insaldana a daga a pagapitan iti tallo uyon a pagay.
Ti makadakes, kapid, saan a bukod ni Damian ti naisalda a daga no di ket bingayda nga agkakabsat iti tawid daydi amada. Malaksid iti dayta, pinarti ni Damian ti nuangna a pagtalon idi agrubuat ti anakna a mapan Saudi. Awan kanon serbi ti nuang ta awan metten talonenna isu nga iparamananna kadagiti kabarioantayo ti sagrapenna a grasia apaman a makapagsimpa ti anakna idiay abrod.
“Nasaysayaat laengen no puyotantayo ti digona ta di pay isu a pakariribukak a pakpakanen tangay saan metten na agguyod iti arado,” kinunkunana kano, banag a sinarurongan dagiti sutil nga agur-uray iti balikbayan a pakairanudanda iti nalanit a maisagid iti karabukob.
Maysa pay a nakarurodan ni uliteg, kapid, idi madamagna a gimmatang ni Damian iti dakkel a telebision tapno maganas kano daytoy ti agbuya iti basketbol ken boksing. Paset ti nangisaldaanna iti daga ti inggatangna iti TV.
Pinilaw ni uliteg dagiti kakabsat ni Damian no apay nga immanamongda a maisalda ti komonda a daga ngem inrason dagitoy nga immanamongda gapu ta kinarian ida ni Damian iti