Kadakkelan a Laban ni Manny?

PUBLISIDAD kano, ‘bagis, no apay nga imbaga ni Manny Pacquiao a saan a pabor iti same- sex marriage.

Wen ta mamati dagiti mangiprompromote kenkuana nga ad-adu latta ditoy Filipinas ti saan a pabor iti same-sex marriage.

* * * Ti imasna, nalipatan ni Manny a kaaduan kadagiti nalalatak iti showbiz ken media, kameng iti LGBT (lesbian, gay, bisexual, transgender).

Isu nga ad-adu ita ti bashers ni Manny iti social media.

* * * Ngem kadakami a biang, ‘bagis, husto laeng ti imbaga ni Manny segun iti pammati wenno relihionna.

Ta no sabali ti kapanunotanna iti dayta nga issue, siempre, ikkatendan idiay relihionna.

Ti laeng dakesna, daydiay wagas ti panangibagana; ken iti daydiay pangngarig nga inusarna.

Nga isu met ti indawatanna iti pammakawan.

* * * Ita, ibagbagada a ti kadakkelan a laban ni Manny ket “Pacquiao versus gayweather.”

Ket saan kano nga agpaatiw dagiti kameng ti LGBT. Daytakan, Manny!

* * * Iti sabali a bangir, awan ti agsao kada Angel Locsin ke Luis Manzano no ania ti gapuna ti nagsinaanda.

Nalabit, agpadada nga adda basolna, aya, ‘bagis?

* * * PAGPALPALPAAN: Kablaaw kadagiti baro nga opisial ti FAMAS nga idauluan ni Ms. Francia Conrado a nabotosan a presidente itay nabiit.

Kakadua ni Ms. Conrado a baro nga opisial da Alice Reyes (1st Vice President), Efren Montano (2nd Vice President), Tess Tan (Secretary), Tita Arcilla (Treasurer), Jun Dadulla (Auditor), Benedict Abaygar (PRO); Marshall da Brian Lu ken Richel Dorotan; Kameng ti Board of Trustees da Dionisio S. Bulong, Cles B. Rambaud, Jun Velasco, Edgar S. Godin, Ariel S. Tabag, Ner Jedeliz, Juan Al. Asuncion, Art Tapalla, ken Aristeo Garcia.—O

(Pasado a Presidente ti FAMAS, mabuya ni Kabagis Eloy kas host iti “Tsismax” iti Global News Network Cable Channel tunggal Biernes, alas sais iti sardam, ken adda replay-na kada Sabado iti alas nuebe iti agsapa ken kada Huebes iti alas dose iti tengnga’t aldaw. Mabuya pay daytoy iti gnntv-asia.com.—AST)