Naannad da James ken Nadine
ITI pannakasursurat daytoy, matagtagiuray ti konsierto a “JaDine Love” da James Reid ken Nadine Lustre. Naipakaammo a naibusan gayam iti tiket isu a nagikamakamda iti tiket nga SRO (standing room only).
Inako da James ken Nadine a madandanaganda ta dakkel kano unay ti venue nga Smart Araneta Coliseum ken sibubukel a pagilian ti makabuya kadakuada ta pay-per-view.
Maipapan met iti panangid-idolo ti tao kadakuada gapu iti akemda iti “On The Wings Of Love,” kuna ni James a mapakatangken-gurong. Dina kano napampanunot nga agbalin a modelo ti sabali a tao.
Gapu ta nakaddidillaw nga adda chemistry-da, sangkasaludsod ti tao no addan relasionda. Kuna ni James a nasingedda kano nga agpagayam ken Nadine.
Nakaddidillaw ketdi nga agan-annad dagitoy nga agsungbat ta amangan no maigalisda ket matakuatan nga addan relasionda. Wen, ta nakaddidillaw iti tigtignayda nga addan nagkinnaawatanda.
* * * No pagibasaran ti post ni Angel Locsin iti Instagram, sinerraannan ti posibilidad nga agsinnubliananda ken Luis Manzano. Wen ta inawaganna daytoyen nga “ex” iti paskilna— a kunana, iti panagsagsaganana a maoperaan iti tengnged, adda met ni Luis nga agkankanta iti “Love Yourself” ni Justine Beiber.
Ngem mabalin a sabali ti nangipapanan ni Angel ta pudno met a kinanta ni Luis ti nasao a kanta iti programana.
Amangan ketdi met no mangnamnama ni Angel nga agmensahe kenkuana ni Luis.—O