Pastor a Pabpabainan ti Kagawad
SALUDSOD:
Maysaak a pastor ditoy ayanmi a barangay. Naminanon a no adda gimongmi, maysa a kagawad ti barangaymi ti umay manggulgulo ket agririaw pay no madama ti panagsersermonko kadagiti kakabsatko iti sektor wenno grupomi. Padpadaksennak pay; ibagbagana nga adda babaik. Saankamin nga agtimtimek no kua ta daytoy a kagawad, adda uyuyongna. Karurodnakami ta ammona a dimi imbotos idi iti eleksion ti barangay. Kinapudnona, isu ti kutit kadagiti nakaruar.
Napunnuankamin, Apo Hues. Ania ngata ti aramidenmi tapno maputed met laengen ti panangsingsingana iti grupomi ken iti panangininsultona kaniak a kas lider ti sektami? Sisasaganakami a mangdupir kenkuana kadagiti dakes nga aramidna kadakami. Dios ti agngina.-Pastor Renie ti Pangasinan
SUNGBAT:
Ti Konstitusion ti Filipinas, ibagana nga adda karbengan ti asino man a makikappon iti ania man a relihion a kayatna (Freedom of Religion). Mainaig iti daytoy, ti mayulim a darum ket ‘tay “interruption of religious worship” wenno panangdisturbo kadagiti agkarkararag a ti dusana ket pannakaibalud manipud iti dua a tawen agingga iti 6 a tawen, segun iti Revised Penal Code. Malaksid iti dayta, linabsingna pay ti Artikulo 133 ti Kodigo Penal (“offending the religious feelings” wenno panangdisturbo iti rikna dagiti agkarkararag wenno miembro ti relihion). Maysa pay a basol ni Apo Kagawad ti panangibabainna kenka iti publiko wenno iti sango dagiti kameng ti sekta a nakaikappenganyo. Segun iti Artikulo 358 ti Kodigo Penal nga asino man a mapaneknekan nga agbasol iti daytoy, madusa iti pannakaibalud agingga iti 4 a tawen ken 2 a bulan. Kamaudiananna, mabalinmo pay nga idarum iti kaso administratibo iti Sangguniang Bayan tapno maikkat.
Sige. Idarumyo dagiti kakasta a kita ti agturay. Saankay’ nga agbuteng ta ti linteg, adda iti likudanyo.—O