Naganas Met ti Agtaraken iti Kalapati
Maitutop dagiti ring-neck ken diamond a kalapati a kas kadkadua a paglinglingayan.
ITI panagtaraken iti kalapati, nalawan ti pagtaenganda a dua a kadapan ti kangatona ken 18 a pulgada ti kaunegna nga agakaba iti 30 agingga iti 36 a pulgada a para iti maysa a paris a ring-neck wenno diamond a kalapati.
Mangikabil iti maysa nga umok iti ngato ti maysa kadagiti suli ti balay dagiti billit ken mangikabil pay iti pagbatayanda.
Mangikabil iti sabali a pagbatayan iti sabali pay a suli tapno adda pagallaallatiwan dagiti kalapati.
Mangikabil iti panganan ken paginuman dagiti kalapati iti uneg ti balayda. Masapul a nalaka laeng a maiserrek dagiti taraon iti uneg ti kulongan tapno saan a maiwara no ipuruak lattan.
Masapul a kanayon nga adda kalub iti batog ti paginuman dagiti kalapati tapno maliklikan ti kontaminasion a maregreg iti danum. Nupay kasta, mabalin met a kanayon a sukatan ti danum a naikabil kadagiti paginuman.
Pagaayat dagiti kalapati ti agay-ayam iti namaga a daga ken ti agkainitan isu a masapul nga ipaay dagitoy kadagiti taraken. Agkarkaraykayda pay iti daga nga agsapul iti igges a tuktokenda. No gumatang iti kalapati, masapul pay nga ammo no ania dagiti ited kadakuada a taraon. Makellaat met dagiti kalapati a maidasaran kadagiti saanda a nakairuaman a taraon a mainayon pay iti pannakakellaatda iti baro nga aglawlawda.
Nasken ngarud nga adda nakasagana a sigud a taraon dagiti kalapati no isangpet dagitoy iti balay. No baliwan ti ipakan kadagiti kalapati, in-inuten daytoy a sukatan a saan ket a kellaaten.
Adu dagiti magatang nga ipakan kadagiti kalapati kadagiti pagtagilakuan. Pilien dagiti babbabassit ti binukelna a para kadagiti diamond a kalapati.
No saan, mabalin met nga ipakan dagiti natural a bukbukel a kas iti trigo wenno nagiling a mais. Ikonsultar iti beterinario no ania ti maitutop a taraon dagiti kalapati. Pagaayat pay dagiti kalapati dagiti nalukneng a taraon a kas iti tinapay, natadtad a presko a natnateng, nalingta nga itlog ken naburakburak a shell.
Agduduma ti kapaut ti biag dagiti kalapati. Kaaduan a 12 agingga iti 15 a tawen ti kapaut ti biag dagiti ring-neck. Adda pay ketdi makadanon iti 20 a tawen. Kaaduan met nga agbiag dagiti diamond a kalapati iti walo agingga iti 12 a tawen. Maitutop dagiti ring-neck ken diamond a kalapati a kas kadkadua a paglinglingayan. Adu a nataengan ti malinglingay kadagitoy a taraken. Mabalin pay nga itugottugot dagiti ubbing kadagiti pagay-ayamanda.—O