Agassawa a diamond a kalapati.
nga aldaw nga inaramid ni Apo Dios!
“Ay, mandiak! No way! Matayak la ketdi a di mainsasaan!”
Ket rinugiannan ti magna. Iti umuna a gundaway, nausarna ti sao a “no way” ken “di mainsasaan” a napidpidutna kadagiti aktibista nga estudiante ti UP Diliman a kimmuykuyoganda ken Bonifacio Colicol a demo-protesta. Sigurado a taga-Bacarra, Ilocos Norte daydi kuttongi nga aktibista a nagsao iti “di mainsasaan”.
Surotem ti ibagak! makaunget ti timekkaunggan. Dayta ibagbagak ti short-cut para kenka. Dikanto magmagnan nga agawid idiay Rosales! Panunotem laeng ket addakan idiay balayyo!
Medio nagkambio iti pannagnana. Ania daydiay a short-cut? nakunana iti bagina. Ken, panunotenna laeng ket addan idiay balayda? Huh! Uray ni Superman, dina maaramid dayta, ni Jesus Christ pay ngata. “Mandiak!” naipigsana, sa pinartakanna ti magna.
OK, no madika! No maminsan, nasayaat met ti nasukir tapno makasursuro. Goodbye! See you in Tomana Weste!
Nariknana ti panagkutikuti ti kimmotna, bimmara sa met la naglamiis, a sinaruno ti panagkarayam nga agpangato ti kasla dakkel a kuton iti durina, derederetso, sa kellaat a rimmuar iti kuppokuppona. Naguni pay: tsik! Napasardeng. Ania daydiay? Naarikapna ti kuppokuppona. OK met, nakunana. Limmag-an ketdi iti panagriknana. Intuloyna ti nagna.
Makasabat iti tallo nga agtutubo. Nabartekda. Nagmayat ti panagsisinnallabayda a tallo tapno awan ti matuang iti igid ti kalsada wenno maikaranukon iti kanal iti kanigidda ket ilayondan ti maturog sadiay. Agsasallapid no kua dagiti naka-Adidas a dapanda ngem ti sallabayda ti nakakaskasdaaw a mangtengngel ken mangbalanse iti pagnada. Aggigiddanda nga agsao iti mother tongue ti probinsia, iti bengngat ti nabartek. Inokuparda ti igid ti kalsada ket awan ti paglisian ni Uppong. Nagsardeng ni Uppong. Bumanesbes latta dagiti lugan nga agpa-Amianan ken agpa-Abagatan. Ania, agatras ket agsubli iti naggapuanna, wenno sumalog iti nauneg a kanal iti kanawanna sa sumalpanto iti taltalon? Dina kabaelan a panunoten ti maikatlo a pagpilianna koma, pagarigan: ti panangsangdona kadagiti tallo ta sigurado a matuangda ket tinto la manglayawen ti aramidenna kadakuada, ket ayos, nakalabasen. Sa magna nga awan taliataliaw.
Ti imasna ken ni Uppong ta nabuntog nga agikeddeng. Idi ipakatna koman ti umuna a planona, addan iti sangona dagiti bartek.