Atab iti Banatabat
Mariing ti ridam iti sang-aw ti langsi
Ti agur-uray, agar-arasaas a baybay.
Maisalog dagiti nakungkongan, nadidingan iti plywood—
Bilog a demotor—
A mangkamakam ti atab iti panagbanatabat
Ti agsapa a kadangsi
Dagiti dibang, susay, siriw, barakuda…
Wenno dagiti tumatabukol, sumasakbong
Nga agsasalip a sumaklap
Iti uluanan dagiti sabang-tangrib
A paglunlonan
Dagiti kubalan, tapunok, bangbangtit, kuskusi…
Ngem adda ballaag dagiti tarukoy
A makaawat iti arasaas ti baybay
Nga itunda dagiti palong iti dapnisan:
Saan nga umdas ti langsi a bayad ti anges
Wenno saan laeng a langsi ti makaited anges
Tapno irupir ti makidangadang kadagiti dalluyon—
A sisasagana a maitabon—
Nga uray nariper ti danum-baybay
No kastoy nga atab iti banatabat.
Wenno ti panagpisawpisaw dagiti dalayday ken balantak
A lunod ken mangilunod
Kadagiti arimbukeng ken kuraraya a mangngalap.
Ngem agriing latta dagiti tahur
A mangsigay, mangtabukol, mangsaiding
Iti langsi ti baybay
Tunggal atab iti banatabat.
--RONNIE E. AGUINALDO